Ձեր վստահելի աղբյուրը

Վրաստանի շրջակա միջավայրի և բնական պաշարների նախարարությունը մշակում է անտառային նոր օրենսգիրք, որի համաձայն, լիովին փոխվելու և խստացվելու են անտառահատումներին վերաբերող դրույթները: Այդ մասին գրում է «Ջավախք Ինֆո» տեղեկատվական հարթակը։

Վրաստանում բնակչության ավելի քան 80% -ը, ըստ աղբյուրի, գյուղական տնային տնտեսության, ջեռուցման և սննդի պատրաստման համար օգտագործում է  տեղական անտառների փայտ: Վրաստանի կառավարությունը նախատեսում է աստիճանաբար գյուղացիներին ապահովել փայտի թափոնների մատակարարմամբ, որպեսզի ավելի քիչ անտառանյութ օգտագործվի:

Բնապահպանական պետական գլխավոր տեսուչ Նելլի Կորկոտաձեն հայտնել է, որ ծառերը տարբեր նպատակներով կտրելու պարտավորությունն իր վրա է վերցրել  «Անտառահատման  ազգային գործակալությունը», որը ղեկավարում է Վրաստանի անտառային տարածքը:

Ըստ նրա, գործակալությունում կան հմուտ մասնագետներ, ովքեր գիտեն, թե որտեղ և  ինչ ծառ  կարող են  կտրել: «Եթե  ծառը   կտրի  մի մարդ, ով չունի համապատասխան գիտելիքներ՝ լինի դա անօրինական, թե օրինական, միևնույնն է,  դա շրջակա միջավայրին վնաս կպատճառի», - հավելել է  Կորկոտաձեն:

Մինչ օրս ապօրինի ծառահատման համար  գործում է  տուգանք 500 լարի (233 դոլար) չափով: Կրկնվող գործողության դեպքում տուգանքը ևս կրկնապատկվում է՝  1000 լարի (մոտ 470 դոլար):

Վերջերս Նորվեգիան դարձել է  առաջին երկիրն  աշխարհում, որը կարողացել է անապատացման ցուցանիշը հասցնել զրոյի:

«Նորվեգիա  հասնելու համար մենք դեռևս շատ ունենք: Մեզ առնվազն մի  քանի տարի  պետք է Նորվեգիային  մոտենալու համար:  Հույս ունենք, որ նոր անտառային օրենսգիրքը, որը գտնվում է մշակման վերջնական փուլում, կներդնի խաղի նոր կանոններ և կբարելավի իրավիճակը», - ասել է Նելլի Կորկոտաձեն:

Կորկոտաձեն հայտնել է, որ Վրաստանում մի քանի գործակալություններ շուրջօրյա անտառային մոնիտորինգ են իրականացնում: Անտառի ազգային գործակալությունը, ինչպես նաև Պահպանվող տարածքների գործակալությունը և Շրջակա միջավայրի վարչությունը իրականացնում են բավականին ամուր վերահսկողություն: Չնայած դրան, դեռ տեղի է  ունենում անտառային ռեսուրսների ապօրինի օգտագործում:

«Մենք պետք է բարձրացնենք  մարդկանց գիտակցությունը, բոլորը պետք է հասկանան, որ յուրաքանչյուր կտրված ծառ  սպառնալիք է շրջակա միջավայրի, հետևաբար նաև մարդկային առողջության համար», - նշել է  նա:

Վրաստանում  անտառները զբաղեցնում են երկրի տարածքի 40% -ը: Մոտավորապես անտառների 97% -ը գտնվում են  Մեծ և  Փոքր Կովկասի լանջերին, իսկ մնացած մասը՝ Արևելյան Վրաստանի  հովիտներում և Կոլխիդայի  սարահարթում: