Ձեր վստահելի աղբյուրը

Մոսկվայում ԱՊՀ երկրների հումանիտար համագործակցության միջպետական հիմնադրամի և Մոսկվայի կառավարության աջակցությամբ հունիսի 12-ին տեղի կունենա ԱՊՀ երիտասարդական սիմֆոնիկ նվագախմբի տոնական համերգը՝ նվիրված ԱՊՀ 25-ամյակին և Ռուսաստանի օրվան։  Հայաստանի պետական երիտասարդական նվագախմբի հասարակայնության հետ կապերի բաժնից հայտնում են, որ նվագախումբը ելույթ կունենա ՀՀ վաստակավոր արտիստ Սերգեյ Սմբատյանի ղեկավարությամբ, ով հրավիրված է որպես հատուկ հյուր։ Համերգը կկայանա Մոսկվայի կոնսերվատորիայի Մեծ դահլիճում։ Տոնական երեկոյի ծրագրում կհնչեն ռուս և ԱՊՀ երկրների կոմպոզիտորների գործեր։

Համերգի պատվավոր հյուրերի թվում կլինեն ԱՊՀ երաժշտական կրթական հաստատությունների ղեկավարներ, ՌԴ Պետդումայի պատգամավորներ, դեսպաններ։

ԱՊՀ երիտասարդական սիմֆոնիկ նվագախմբի առաջին համերգը կայացել է 2007թ. նոյեմբերի 12-ին՝ հայտնի դիրիժոր, ՌԴ, Ղազախստանի և Թաթարստանի ժողովրդական արտիստ Ֆուատ Մանսուրովի ղեկավարությամբ։ Տարբեր տարիներին ԱՊՀ երիտասարդական նվագախումբը հանդես է եկել Յուրի Սիմոնովի, Վլադիմիր Սպիվակովի, Մարկ Գորենշտեյնի ղեկավարությամբ։
Վերջին տարիների ընթացքում այս նվագախումբը դարձել է մի հարթակ, որտեղ իրենց կատարողական արվեստի ձեռքբերումներն են ցուցաբերել ԱՊՀ երիտասարդները։ Այն համախմբել է տարբեր կատարողական դպրոցների, ոճերի, ժանրերի և ուղղությունների երաժիշտների։ Շնորհիվ այս կոլեկտիվի՝ ԱՊՀ երկրների երիտասարդ երաժիշտների մի ամբողջ սերունդ աջակցություն է ստացել իր պրոֆեսիոնալ գործունեության ընթացքում։