«Նաիրիտ»-ը վերագործարկելը ոչ մեկին չի հետաքրքրում. Նախարար Յոլյան
«Նաիրիտ»-ի ներկա վիճակը և հետագա զարգացումները ուսումնասիրելու նպատակով ստեղծված աշխատանքյաին խումբը գործարանը վերագործարկելու վերաբերյալ առաջարկություն չի ստացել: Այդ մասին այսօր Ազգային ժողովում հարցուպատասխանի ժամանակ պատասխանելով ԱԺ պատգամավոր Լևոն Զուրաբյանի հարցին, հայտարարեց Էներգետիկայի և բնական պաշարների նախարար Լևոն Յոլյանը:
«Եթե լինի քիչ, թե շատ իրատեսական առաջարկ, հետաքրքրություն «Նաիրիտ»-ի վերագործարկման ուղղությամբ՝ խնդրել եմ ներկայացնել ինձ: Բայց այս պահի դրությամբ ոչ մեկի կողմից ոչ մի առաջարկություն «Նաիրիտ»-ի հետագա վերագործարկման առումով չի ներկայացվել», -հավելեց պաշտոնյան:
Ինչ վերաբերում է «Նաիրիտ»-ում գույքագրման մասին պատգամավորի հարցին, նախարարը նկատեց, որ գույքագրում չի կատարվում: Նրա խոսքով, այդ գործարանում կան պայթյունավտանգ և ուժեղ ներգործող թունավոր նյութեր:
«Ընդամենը աշխատանքային խմբի առաջարկությամբ ուսումնասիրվել են այդ թունավոր նյութերը: Մենք պայմանավորվածություն ենք ձեռք բերել արտակարգ իրավիճակների նախարարի հետ՝ դրանք վնասազերծելու մասին»,- հավելեց նա:
Յոլյանը պատգամավորին հիշեցրեց, որ «Նաիրիտ»-ում աշխատանքը դադարեցվել է 2010 թվականի մարտից և մինչ օրս այդ գործարանում կաուչուկի արտադրություն չի իրականացվում:
Պատգամավորն իր արձագանքման ժամանակ ասաց, որ արդեն իսկ կա գործարանը փակելու և դրա գույքը բաժանելու որոշում, և նախարարը փորձում է դա թաքցնել:
«Հիմա դուք զբաղված եք այդ պլանի հիմքերը նախապատրաստելու և այդ որոշման պատասխանատվությունը ձեր վրայից գցելու գործով»,- դիմելով նախարարին ասաց Զուրաբյանը:
Ի պատասխան նախարար Յոլյանն ասաց, որ տեղյակ չէ, թե ինչ լուրերի հիման վրա է պատգամավորը նման պնդում անում:
«Եթե այս պահի դրությամբ ոչ մի առաջարկություն չի ներկայացվել, դժվարանում եմ ձեզ որևէ բան ասել: Ինչ վերաբերում է գույքագրմանը, ապա գույքագրում իրականացվում է թունաքիմիկատների շրջանում և ոչ թե՝ գույքի», -հավելեց Լևոն Յոլյանը:
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
