Ձեր վստահելի աղբյուրը

«Հուսով եմ, որ հայ-չեխական համաժողովը կնպաստի երկու երկրների բարեկամական հարաբերությունների և տնտեսական կապերի հետագա ընդլայնմանը, ինչպես նաև չեխ գործարարների կողմից Հայաստանի` որպես հնարավորությունների երկրի բացահայտմանը»,- այս մասին այսօր Երևանում անցկացվող Հայաստան-Չեխիա գործարար համաժողովի ժամանակ հայտարարեց ՀՀ նախագահ Սերժ Սարգսյանը:

Հիշեցնենք, որ Նախագահ Սերժ Սարգսյանի հրավերով հունիսի 7-9-ը պետական այցով Հայաստան է այցելել  Չեխիայի Հանրապետության Նախագահ Միլոշ Զեմանը: Այցի շրջանակներում կազմակերպվել է  հայ-չեխական գործարար համաժողով, որին մասնակցում են ութ տասնյակից ավելի հայկական և երկու տասնյակից ավելի չեխական ընկերություններ:

Նախագահի խոսքերով՝  այսօր Հայաստանում գործում են չեխական կապիտալով 20 ընկերություններ և Հայաստանն իրենց  համար հասցրել են բացահայտել մի շարք չեխական ընկերություններ:

«Գաղտնիք չէ, որ ներդրումները հոսում են այնտեղ, որտեղ առկա է երկու կարևոր գործոն` կայունություն ու տնտեսական շահ: Կարող եմ վստահորեն ասել, որ Հայաստանում այս առումով ստեղծված են բոլոր նախադրյալները: Հայաստանի անկախությունից ի վեր մակրոտնտեսական կայությունը մշտապես եղել է մեր գերակա ուղղությունը և, շնորհիվ խելամիտ դրամավարկային և հարկաբյուջետային քաղաքականության, ներկայումս ունենք կայուն մակրոտնտեսական միջավայր»,-ընդգծեց Սերժ Սարգսյանը:

Նրա խոսքերով՝  գլոբալիզացիայի ներկա դարում համաշխարհային տնտեսական ճգնաժամը, արտաքին բացասական տնտեսական ազդակները իրենց ազդեցությունն են ունենում բոլոր երկրների և, առաջին հերթին՝ փոքր տնտեսությունների վրա, ինչպիսին Հայաստանինն է: 

«Այդուհանդերձ, նաև այս պայմաններում 2015թ-ին Հայաստանի տնտեսական աճը կազմել է  3 տոկոս, այն դեպքում, երբ տարածաշրջանի երկրներից շատերը համատարած տնտեսական անկում են գրանցել»,- նշեց ՀՀ նախագահը՝ հավելելով, որ Հայաստանը անբավարար է համարում տնտեսական աճի նման ցուցանիշը, ուստի պետք է մեծ ջանքեր  գործադրեն, որպեսզի այդ 3 տոկոսը գոնե եռապատկվի: