Ձեր վստահելի աղբյուրը

Երևանում այսօր կայացած Հավաքական անվտանգության մասին պայմանագրի կազմակերպության (ՀԱՊԿ) անվտանգության խորհուրդների քարտուղարների կոմիտեի նիստում որոշում կայացվեց, որ հաջորդ նիստը կրկին կկայանա Երևանում այս տարվա հոկտեմբեր ամսին: Այս մասին այսօր նիստից հետո կայացած ասուլիսում հայտարարեց ՀԱՊԿ գլխավոր քարտուղար Նիկոլայ Բորդյուժան:

ՀԱՊԿ գլխավոր քարտուղարը տեղեկացրեց, որ նիստի ընթացքում մասնավորապես  քննարկվել են միջազգային ահաբեկչության ու ծայրահեղականության հակազդման ոլորտում համագործակցությանը, մինչև 2025 թ. համար ՀԱՊԿ հավաքական անվտանգության ռազմավարության նախագծի համաձայնեցման ընթացքին վերաբերող հարցեր:

Նիկոլայ Բորդյուժայի խոսքով` քննարկվեցին  նաև միջազգային ահաբեկչության ու ծայրահեղականության դեմ պայքարի ոլորտում ՀԱՊԿ անդամ-երկրների հավաքական անվտանգության համակարգերի զարգացման  հարցում լրացուցիչ միջոցառումների հետ կապված հարցերը,  տեղեկություններ ներկայացվեցին նաև  ՀԱՊԿ՝ մշտական հիմունքներով գործող  մարմինների պաշտոնատար անձանց ռոտացիայի մասին  որոշման կատարման ընթացքի մասին:

Նշենք, որ նիստի ընթացքում քննարկվեցին և ստորագրվեցին «ՀԱՊԿ անդամ-պետություններում ահաբեկչական և ծայրահեղական ճանաչված կազմակերպությունների ցանկի մասին», «Արտաքին քաղաքականության, անվտանգության և պաշտպանության հարցերով ՀԱՊԿ անդամ-պետությունների ներկայացուցիչների 2016թ. երկրորդ կիսամյակի և 2017թ. առաջին կիսամյակի խորհրդատվությունների պլանի մասին» որոշումները, ինչպես նաև անվտանգության ոլորտին առնչվող մի շարք այլ փաստաթղթեր: