Ձեր վստահելի աղբյուրը

Ազգային ժողովի սեպտեմբերյան նստաշրջանի ժամանակ, կոռուպցիայի դեմ պայքարի շրջանակներում, խորհրդարան կներկայացվի օրենսդրական փաթեթ, որում ընդգրկված կլինեն պաշտոնյաների հայտարարգրերին, ինչպես նաև ապօրինի հարստացման քրեականացմանը վերաբերող նախագծեր: Այդ մասին այսօր խորհրդարանում հարցուպատասխանի ժամանակ հայտարարեց կառավարության աշխատակազմի ղեկավար-նախարար Դավիթ Հարությունյանը՝ պատասխանելով պատգամավոր Տիգրան Ուրիխանյանի հարցին:

«Այժմ կատարվում են նաև միջազգային փորձի ուսումնասիրություններ, որի արդյունքներով պետք է պատրաստվի խորհրդարանին ներկայացվող օրենքների նախագծերի փաթեթը», -տեղեկացրեց Հարությունյանը:

Ըստ կառավարության ներկայացուցչի, իրենք դրանով չեն սահմանափակվելու և փոփոխություններ են կատարվելու նաև գնումներին վերաբերող օրենսդրության մեջ:

Պատգամավորի մյուս հարցին, թե կոնկրետ պատիժներ սպասվելո՞ւ են «սահմանն անցած» պաշտոնյաներին, Հարությունյանը պատասխանեց, որ «շատ ավելի սթափ պետք է վերաբերվել կոռուպցիայի դեմ պայքարին»:

Այդ առումով, ըստ պաշտոնյայի, պետք է ստեղծել ինստիտուցիոնալ համակարգ ու երաշխիքներ:

«Խնդիրը պատժի անխուսափելիությունն է բոլորի համար: Սա ամենակարևորն է: Եվ այն գործիքներն է, որ պետք է կյանքի կոչվեն: Օրինակ՝ հայտարարագրման ինստիտուտը պետք է փոխվի. Սողանցքերը ուսումնասիրված են, և դրանք փակելով մենք երաշխավորված կլինենք, որ գոնե հիմնական դեպքերը պետք է տեսանելի լինեն հասարակության, խորհրդարանի համար: Կոռուպցիայի դեմ պայքարը այդքան հեշտ պայքար չէ: Շատ ժողովրդավար երկրներում, այնուամենայնիվ, խոսում են առկա կոռուպցիայի մասին: Մենք չենք կարող, իհարկե, հպարտանալ լուրջ արդյունքներով, բայց վստահեցնում եմ, որ մենք ամենայն լրջությամբ ենք վերաբերում այդ հարցին ու սեպտեմբերին կներկայացնենք հակակոռուպցիոն բավականին լուրջ փաթեթ», -հայտարարեց Դավիթ Հարությունյանը: