Ձեր վստահելի աղբյուրը

Պոլսո Հայոց պատրիարքի փոխանորդ Արամ արքեպիսկոպոս Աթեշյանի նամակը՝ Թուրքիայի նախագահ Ռեջեփ Թայիփ Էրդողանին, բուռն քննարկումների առիթ է դարձել:

Հիշեցնենք, օրերս Բունդեսթագի կողմից Հայոց ցեղասպանության ընդունումից հետո Աթեշյանը այդ փաստի առնչությամբ ափսոսանքով լի նամակ էր հղել Էրդողանին:

«Հարգելի՛ պարոն նախագահ, առաջին աշխարհամարտի ողբերգական ժամանակաշրջանում կատարված դեպքերի վերաբերյալ Բունդեսթագի կայացրած որոշումը առաջ է բերել մեր ափսոսանքը: Որպես Թուրքիայի հայ համայնք՝ մենք հայտնում ենք Ձեզ մեր ափսոսանքը՝ ի նշան մեր անկեղծ զգացմունքների արտահայտության: Անընդունելի է, որ խորհրադարանը, որը ձևավորվել է գերմանացի քաղաքացիների քվեների միջոցով և պարտավոր է ընդունել իր ժողովրդի խաղաղության, բարգավաճմանն ու անվտանգությանն ուղղված օրենքներ,  կարծիք է արտահայտում, անկախ այն հանգամանքից, որ այն չունի դրա իրավունքը: Անընդունելի է, որ այդ խորհրդարանն օրինականացնում է այս որոշումը ամբողջ գերմանացի ժողովրդի անունից և իրեն դատավորի դեր վերագրում»,- ասել էր Պոլսո հայոց պատրիարքարանի փոխանորդը իր նամակում:

Հայաստանում շատերն են դժգոհ արքեպիսկոպոսի վարքից, սոցիալական ցանցերում մարդիկ արտահայտում են իրենց զայրույթը՝ Աթեշյանի վարքը համարելով անընդունելի:

Դժգոհել է նաև Թուրքիայում հրապարակվող «Ակօս» թերթի խմբագրակազմը, որի խմբագրականում նշվում է, մասնավորապես, հետևյալը.

«Զայրույթի և ամոթանքի զգացումով ենք ընթերցել Գերմանիայում ընդունված Հայոց ցեղասպանության բանաձևի վերաբերյալ նախագահ Էրդողանին ուղղված Ձեր նամակը, որում տեղ է գտել «որպես Թուրքիայի հայ համայնք» արտահայտությունը: Այս նամակն ընդունեք որպես այդ համայնքի, սակայն ձեր տեսակետների պարունակությանն ու ոճին չհամաձայնող ներկայացուցիչների խոսք: Տվյալ պետության քաղաքացի հանդիսացող ժողովրդի համակարգված բնաջնջումը սեփական հողերում` սեփական պետության որոշմամբ,  Ձեր կողմից, պետական լեզվով, որպես «Առաջին համաշխարհային պատերազմի ողբերգական ժամանակահատվածում տեղի ունեցած» ներկայացվելը վիրավորանք է այդ ժողովրդի նախնիների, զոհերի և ժառանգների համար, որի մաս Դուք եք կազմում»:

Մայր Աթոռ սուրբ Էջմիածինը մեկնաբանելով Էրդողանին ուղղված հայ հոգևոր առաջնորդի նամակը, կապել էր այն Թուրքիայի վարած քաղաքականության հետ: «Բնավ չփորձելով արդարացնել որևէ մեկին, չենք բացառում հարկադրանքի պարագան», -ասել էր Մայր Աթոռ Սուրբ Էջմիածնի Տեղեկատվական համակարգի տնօրեն տեր Վահրամ քահանա Մելիքյանը:

Panorama.am-ը Տեր Վահրամից փորձեց մի քանի հարցերի պատասխաններ ստանալ

Panorama. Հաշվի առնելով հայկական համայնքի դժգոհությունը, չեք կարծո՞ւմ, որ Արամ Աթեշյանը իր անձնական շահերից դրդված է նամակ հղել Թուրքիայի նախագահին:

Տեր Վահրամ քահանա Մելիքյան. Չեմ կարող այս պահին ենթադրություն անել, ինչպեսև միևնույն ժամանակ ասել, որ ամբողջ հայ համայնքը չի ողջունում կամ և այլն: Ես նման գնահատականներ այս պահին չեմ կարող տալ:

Panorama.am Հայաստանում ևս որոշ շրջանակներում կա դժգոհություն Հայոց պատրիարքի փոխանորդի արարքի կապակցությամբ:

Տեր Վահրամ քահանա Մելիքյան. Ես ինքս նույն զգացումներն ու ապրումներն ունեմ և ցավով եմ ծանոթացել այդ նամակի բովանդակությանը անձնապես: Սակայն միևնույն ժամանակ որքանով էլ դա մեզ մոտ հուզում է առաջացնում, ես գտնում եմ, որ մենք լիարժեքորեն չենք պատկերացնում այնտեղի իրավիճակը: Մենք շատ և շատ պարագաներ պետք է հաշվի առնենք, եզրակացություններ դատողություններ անելուց, առավել ևս նման բուռն ձևով արձագանքելու այդ ամենին: Սակայն, կրկնում եմ, որ չեմ արդարացնում որևէ մեկի և Արամ արքեպիսկոպոսի նամակի բովանդակությունը, որովհետև անձնապես չեմ կարողանում դա ընկալել: Բայց պետք է հաշվի առնել, թե ինչպիսի երկրում են նրանք ապրում և ինչպիսի պայմաններում է ապրում հայ համայքնը:

Panorama.am. Ի՞նչ կարող էր լինել հակառակ դեպքում, այսինքն՝ եթե նման նամակ չգրվեր Թուրքիայի նախագահին, ինչ կարող էր լինել:

Տեր Վահրամ քահանա Մելիքյան. Ես չեմ ուզում ենթադրություններ անել և այդ ենթադրություններն ավելորդ տեղը խառնաշփոթ ստեղծեն ու մարդկանց ծանր վիճակի մեջ դնեն: Կարծում եմ՝ ժամանակի մեջ այս ամենը կհստակեցվի ու իրական պատճառները այս ամենի ի հայտ կգան: