![](https://panorama.am/news_images/532/1593901_1/arca.thumb.jpg)
ArCa համակարգի վճարային քարտ ունեցող Beeline բաժանորդները կկարողանան օգտվել քարտերից իրենց բջջային հեռախոսների միջոցով
«Արմենիան Քարդ» ՓԲԸ-ն Beeline-ի և «Նիկիտա Մոբայլ»-ի հետ համատեղ հայտարարում են USSD ArCa ծրագրի գործարկման մասին:
«ԱրմենՏել» ՓԲԸ հասարակայնության հետ կապերի բաժնի փոխանցմամբ՝ ծրագրիը նախատեսված է Beeline բջջային կապի բոլոր բաժանորդների և ArCa համակարգի բանկերի քարտապանների համար, ովքեր, իրենց բանկում քարտի համարին կցելով Beeline բջջային համարը, հնարավորություն կստանան իրականացնել մի շարք գործառնություններ «Արմենիան Քարդ» ՓԲԸ-ի կողմից տրամադրված պարզ և հարմար USSD ինտերֆեյսի միջոցով:
Մասնավորապես, քարտապանները կկարողանան իրական ժամանակում օպերատիվ կերպով տեղեկատվություն ստանալ վճարային քարտի մնացորդի վերաբերյալ, ստանալ տվյալ քարտով իրականացված վերջին 4-ից մինչև 5 գործառնությունների քաղվածքը, ինչպես նաև անհրաժեշտության դեպքում արգելափակել քարտը օրվա ցանկացած ժամի:
«Beeline-ը մշտապես փորձում է այպես անել, որ հաճախորդների համար լինի պարզ և հարմար: Այս հարցում մենք չենք սահմանափակվում սեփական սակագնային փաթեթներով ու ծառայություններով և մեր գործընկերների հետ համատեղ ձգտում ենք բաժանորդներին առաջարկել նոր ծառայություններ, որոնք կլինեն օգտակար և հարմար: Մենք վստահ ենք, որ USSD ArCa նորարարական ծառայությունը զգալիորեն կհեշտացնի բանկային հաշվով կամ քարտով գործառնությունների գործընթացը հաճախորդի համար` անկախ ժամից և հեռավորությունից», - նշել է Հայաստանում Beeline-ի Գլխավոր տնօրեն Անդրեյ Պյատախինը:
«Նիկիտա Մոբայլ» ՍՊԸ գլխավոր տնօրեն Արա Յագդջյանն էլ ասել է. «Մեր առջև դրված էր բարդ առաջադրանք ինտեգրելու USSD մենյուն Beeline բաժանորդների համար և «Արմենիան Քարդ» ՓԲԸ գործառնական կենտրոնի հետ: Մենք հաջողությամբ լուծեցինք մեր առջև դրված խնդիրները: Սա մեր ոչ առաջին նման ծրագիրն է, և մենք հույս ունենք, որ ապագայում մեզ սպասում են նմանաատիպ հետաքրքիր խնդիրներ, որոնք մենք կլուծենք` օգտագործելով մեր ստեղծագործական և տեխնիկական ներուժը»:
«Beeline-ն առաջինն արձագանքեց մեր նոր գաղափարին և ծառայությանը, ինչի համար մենք երախտապարտ ենք ընկերությանը: Վստահ եմ, որ ծառայության գործարկումից հետո քարտապանները կգնահատեն դրա առավելությունները, և այն կընդլայնվի այլ բջջային օպերատորների միանալու հաշվին: Իսկ Beeline-ն արժանիորեն կվայելի առաջամարտիկի հաջողության պտուղները, - նշել է «Արմենիան Քարդ» ՓԲԸ գործադիր տնօրեն Իշխան Մխիթարյանը։
Ծառայությունից օգտվելու համար անհրաժեշտ է ուղարկել *116# USSD-հրահանգը և հետևել մենյուի հրահանգներին` առաջարկված ցանկից ընտրելով անհրաժեշտ ծառայությունները:
Նշենք, որ USSD ArCa ծառայությունը հասանելի է ինչպես Հայաստանի տարածքում, այնպես էլ դրանից դուրս` ռոումինգի ակտիվացման դեպքում: Beeline նույն համարին կարելի է ամրագրել ArCa համակարգի բանկերի մի քանի քարտ:
Ծառայությանը միանալու համար քարտապանը պետք է դիմի իրեն սպասարկող բանկ։
Լրահոս
Տեսանյութեր
![Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան](https://panorama.am/video_images/17/50811_1/mela_6760_thumb_v1_thumb_v1_thumb.thumb.jpg)
Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան