Ձեր վստահելի աղբյուրը

Գերագույն խորհրդի նախկին պատգամավոր  Ազատ Արշակյանը  համարում է,  որ Արցախի  նկատմամբ  պետք է հատուկ հոգատարություն ունենալ. նրա հեղինակությունը, վարկը չափազանց կարևոր են  ոչ միայն  Արցախի համար, այլ նաև Հայաստանի  Հանրապետության  և համայն  հայության համար. «Այսինքն՝ այնտեղի քաղաքական  գործիչները, քաղաքացիները, զինվորականները  չափազանց մեծ  պատասխաատվություն են  կրում,  այնտեղ  ապրելը պատասխանատվություն է»։

«Առավոտ»-ի հետ զրույցում ադրադառնալով  Լեռնային Ղարաբաղի  Հանրապետության  Ազգային Ժողովի  պատգամավոր  Հայկ Խանումյանի ծեծի ենթարկելուն՝ Արշակյանն ասել է. «Ոչ ոք  իրավունք չունի  ինքնադատաստան կազմակերպել, ոչ ոք իրավունք չունի որոշել և որևէ մեկին պատժել, առավել ևս՝ չի կարելի հարձակվել իշխանության վրա, իսկ Ազգային ժողովի պատգամավորը  իշխանություն է։ 

Ես համարում եմ, որ հարձակում է եղել  Արցախի իշխանության վրա, Հայաստանի իշխանության վրա՝ միջադեպի համար եմ ասում։  Դա միանշանակ  դատապարտելի է և պատվի խնդիր է, որ Արցախի իշխանությունը, Հայաստանի իշխանությունը շտապ, շուտ հայտնաբերեն և պատժեն հանցագործներին, որոնք ինքնադատաստան են տեսել Ազգային ժողովի պատգամավորի նկատմամբ»։