![](https://panorama.am/news_images/532/1594112_1/f57598b02955d0_57598b029560d.thumb.jpg)
Դավիթ Լոքյանը Ժան-Կլոդ Ֆրեկոնի հետ քննարկել է ՏԻ վերաբերյալ օրենսդրության բարեփոխումների փաթեթը
Հայաստանի Հանրապետության տարածքային կառավարման և զարգացման նախարար Դավիթ Լոքյանն այսօր ընդունել է Եվրոպայի խորհրդի Տեղական և տարածքային իշխանությունների կոնգրեսի պատվիրակությանը՝ Կոնգրեսի նախագահ Ժան-Կլոդ Ֆրեկոնի գլխավորությամբ: Այս մասին տեղեկանում ենք ՀՀ տարածքային կառավարման և զարգացման նախարարության հասարակայնության հետ կապերից։
Ողջունելով հյուրերին` նախարարը բարձր է գնահատել ԵԽ Տեղական և տարածքային իշխանությունների կոնգրեսի կողմից ցուցաբերվող աջակցությունը տեղական ինքնակառավարման համակարգի կայացման գործում: «Այն պարտավորությունները, որ մենք ստանձնել ենք Հայաստանի տեղական ինքնակառավարման համակարգում, մեզ համար շատ կարևոր են և, կարծում եմ, որ մենք կկարողանանք ամբողջապես այդ խնդիրները լուծել մեզ հատկացված ժամանակահատվածում»,-հանդիպման սկզբում ասել է նախարարը:
Հանդիպմանն անդրադարձ է կատարվել ՏԻ վերաբերյալ օրենսդրության բարեփոխումների փաթեթին: Նախարարը նշել է, որ համակարգում առկա խնդիրները` կապված սուբսիդիարության սկզբունքի, լիազորությունների տարբերակման և սահմանազատման, միջհամայնքային համագործակցության, վարչական վերահսկողության, ֆինանսական համահարթեցման և հարկային տոկոսադրույքների շրջանակի հետ, տեղայնացվելու են օրենսդրական բարեփոխումների փաթեթում:
ԵԽ Տեղական և տարածքային իշխանությունների կոնգրեսի նախագահ Ժան-Կլոդ Ֆրեկոնը շնորհակալություն է հայտնել նախարարին ջերմ ընդունելության համար և նշել, որ նախկին Խորհրդային Միության ժողովրդավար երկրների մեջ Հայաստանն ամենից արագ և արդյունավետ կերպով է իրականացնում ապակենտրոնացումը: Պարոն Ֆրեկոնը նշել է, որ ԵԽԽՎ մոնիտորինգի հանձնաժողովը բարձր է գնահատում Հայաստանի հանձնառությունը տեղական ժողովրդավարության ամրապնդման գործում ստանձնած պարտավորություններին և գոհունակությամբ փաստել, որ Հայաստանում տեղական ժողովրդավարության ճանապարհային քարտեզի պարտականությունների մեծ մասն արդեն իրականացվել են: «Մենք գիտենք, որ դուք ամեն ինչ անում եք ձեր կողմից այդ առաջընթացն ապահովելու համար»,- նշել է ԵԽ Տեղական և տարածքային իշխանությունների կոնգրեսի նախագահը:
Հանդիպմանն անդրադարձ է կատարվել նաև համայնքների խոշորացման գործընթացին: Նախարարը հյուրերին ներկայացրել է արդեն իրականացված և նախատեսվող պիլոտային ծրագրերը:
Հանդիպման ավարտին նախարար Դավիթ Լոքյանը ևս մեկ անգամ շնորհակալություն է հայտնել Ժան-Կլոդ Ֆրեկոնին` Հայաստանի տարածքային կառավարման և տեղական ինքնակառավարման համակարգում ԵԽ Կոնգրեսի կողմից իրականացվող բարեփոխումների և շարունակական աջակցության համար:
Լրահոս
Տեսանյութեր
![Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան](https://panorama.am/video_images/17/50811_1/mela_6760_thumb_v1_thumb_v1_thumb.thumb.jpg)
Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան