Ձեր վստահելի աղբյուրը

«Մենք չունենք ռազմավարական տեսողություն ունեցող իշխանություն, այլ ունենք կոնյուկտուրային, օրվա խնդիրներով զբաղվող իշխանություն»,-այսօր Ազգային ժողովում 2015-ի բյուջետային քննարկումների ժամանակ հայտարարեց ԱԺ ՀԱԿ խմբակցության ղեկավար Լևոն Զուրաբյանը:

Պատգամավորը հիշեցրեց, որ 2015-ին իրենք տնտեսական ճգնաժամ են կանխատեսել, և դա չի փոխվել ու վիճակը այժմ էլ նույնն է:

«Չգիտե՞ն, որ չի կարելի անընդհատ պարտքեր կուտակել և չիրագործել զարգացման ծրագրեր, որոնց շնորհիվ պետք է կարողանանք այդ պարտքերը հետ տալ, քանի որ ադպես Հայաստանը պարզապես գլորվում է պարտքային փոսի մեջ, որից դուրս գալու գինը լինելու են մարդկային և տարածքային կորուստները։

Գիտեն, բայց գալիս են այստեղ, ներկայացնում են ամեն ինչ վայելչագեղ տեսքով և օլիմպիական հանգստությամբ, տեղ-տեղ էլ իրենց վերևներից  սեթևեթ հանդուրժողականությամբ հումորներ են շաղ տալիս, կարծես ոչինչ չի եղել։ Եթե մի քիչ ադեկվատ լինեիք իրականությանը, պետք է գայիք և հայտարարեիք հետևյալը:

Երկիրն այս մեթոդներով այլևս կառավարել չի կարելի: Հայաստանը ծանր տնտեսական ճգնաժամի մեջ է, ինչը սպառնում է մեր ազգային անվտանգությանը: Պետք է արագորեն գտնել և կատարել արմատական քայլեր, որոնք կտրուկ կփոխեն երկրում սոցիալ տնտեսական միտումների ընթացքը:

Նորից պնդում ենք, պետք է հանրային քննարկման լայն ձեւաչափերով հրատապ մշակել և ընդունել հակաճգնաժամային ծրագիր, դրա մշակման մեջ ընդգրկել բոլոր լավագույն մասնագետներին՝ Ազգային Ժողովը դարձնելով նման հանրային բանավեճի հիմնական հարթակ», -հայտարարեց ընդդիմադիր պատգամավորը:

Պատգամավորի խոսքն ամբողջությամբ՝ տեսանյութում.