Ձեր վստահելի աղբյուրը

«Ադրբեջանի ստերն ուղղակի անվերջ են ու հավերժ»,- այս մասին այսօր գործադիրի  նիստից հետո լրագրողների հետ զրույցում ասաց ՀՀ փոխարտգործնախարար Շավարշ Քոչարյանը՝ մեկնաբանելով ադրբեջանական կողմի այն հայտարարությունները, թե հայկական կողմն է հրադադար խնդրել, դրա համար էլ ապրիլյան պատերազմը դադարեցվել է:

Բացի այդ, ըստ նրա, Ադրբեջանը կրկին պնդում է, թե միջազգային իրավունքով իրենց տարածքային ամբողջականությունն է առաջնային, այնինչ՝ ճիշտ հակառակն է:

«Նույնիսկ Գերմանիայում Ալիևի հայտարարության մեջ առնվազն վեց բացահայտ կեղծիք կար», - նշեց Շավարշ Քոչարյանը:

Ըստ նրա՝ հայկական կողմը մշտապես հանդես է եկել այն բոլոր միջոցառումների օգտին, որոնք միտված են հրադադարի ռեժիմի պահպանմանն ու ամրապնդմանը: Դա վերաբերում է հետաքննության մեխանիզմին, դիպուկահարների հետ քաշմանը և այլն:

Շավարշ Քոչարյանը նշեց նաև, որ հետաքննության մեխանիզմների ներդրման վերաբերյալ կողմերն արդեն քննարկում են կոնկրետ փաստաթղթեր:

«Եվ այստեղ արդեն կերևա՝ իրոք Ադրբեջանը, ինչպես ասում էր Վիեննայում,  համաձայն է այդ ամենին և պատրաստ է գնալ այդ ճանապարհով, թե կփորձի այդ ծրագրերի իրականացումը կապել ինչ-որ այլ հարցերի հետ»,- նշեց Շ.Քոչարյանը: