Ձեր վստահելի աղբյուրը

Հայաստանի  և Ռուսաստանի միջև Հավաքական անվտանգության կովկասյան տարածաշրջանում ՀՕՊ  միավորված տարածաշրջանային համակարգ ստեղծելու մասին համաձայնագրի՝ այս պահին քննարկումը պայմանավորված է աշխարհքաղաքական գործընթացներով, ինչպես նաև՝ Ռուսաստանի արտաքին քաղաքականության հետ: Նման տեսակետ հայտնեց ՀՀ նախկին փոխարտգործնախարար, ՀՀ արտակարգ և լիազոր դեսպան Արման Նավասարդյանը, ով մասնակցում էր  «Հակաօդային պաշտպանության միավորված համակարգ ստեղծելու համաձայնագիրը Հայաստանի ու Ռուսաստանի միջև» թեմայով բանավեճին:

«Ես ուզում եմ ասել, որ այստեղ ըստ երևույթին Հայաստանի և Ռուսաստանի հետաքրքրություններն ու ստրատեգիական ուղղվածությունը համընկնում են: Այսինքն այն, ինչ Ռուսաստանն այսօր ուզում է անել, օգտակար է նաև մեզ համար»,-կարծիք հայտնեց Նավասարդյանը:

Դեսպանը նման համաձայնագրի քննարկումները պայմանավորում է  Ուկրաինայում, առաջիկայում նաև Լեհաստանում ՀՕՊ համակարգերի ստեղծմամբ:

«Եթե ուշադիր նայենք դրանց պարամետրերը, կտեսնենք, որ դրանք շատ լուրջ սպառնալիք են Ռուսաստանի համար: Տեղադրված են այնպիսի համակարգեր, որոնց հրթիռները 3-4 րոպեում կարող են հասնել Սոչի: Այնպես որ Ռուսաստանը չէր կարող կանխարգելիչ քայլեր չանել: Եվ անում է»,-ասաց բանախոսը:

Արման Նավասարդյանը նկատում է, որ Ռուսաստանի շահերից բխելով հանդերձ, ՀՕՊ միավորված համակարգի ստեղծումը Հայաստանի համար վատ առիթ չէ՝ ապահովելու համար հակաօդային պաշտպանությունը:

«Սա բխում է մեր ազգային շահերից»,-ասաց նա, հիշեցնելով, որ համաձայնագրի շուրջ քննարկումները շարունակվում են արդեն երկու տարի:

Հիշեցնենք, որ համաձայնագրի վերաբերյալ ՀՀ ՊՆ-ն երեկ հրապարակեց տեղականք, որտեղ մասնավորապես նշվում է. «ՀՀ ԶՈՒ ՀՕՊ զորքերը ինքնուրույն կարող են համագործակցել ցանկացած այլ ՀՕՊ համակարգերի հետ, ընտրություն կատարելու հարցում նրանք ազատ են) իրականացնում է Ռուսաստանի Դաշնության զինված ուժերի օդատիեզերական ուժերի գլխավոր հրամանատարը, իսկ ընդհանուր ղեկավարումը` Ռուսաստանի Դաշնության Հարավային զինվորական օկրուգի զորքերի հրամանատարը (սա այն դեպքում, երբ ռուսական կողմի համար առաջացել է ագրեսիայի սպառնալիք կամ հայկական կողմն ի վիճակի չէ ինքնուրույն հաղթահարել առաջացած սպառնալիքը):

Համաձայնագիրը հնարավորություն է տալիս օգտագործել ՌԴ ԶՈՒ օդատիեզերական զորքերի հնարավորությունները` ընդհուպ մինչև միջուկային զենքի կիրառում: ՌԴ ԶՈՒ օդատիեզերական ուժերն ունեն արբանյակային համակարգ, որը ՀՀ տարածքում կարող է օգտագործվել ի շահ ՀՀ ԶՈՒ ՀՕՊ զորքերի: Ռուսական կողմն ունի նաև հսկման համակարգեր, որոնք նույնպես կարող են կիրառվել ի շահ ՀՀ ԶՈՒ ՀՕՊ զորքերի»: