Ձեր վստահելի աղբյուրը

Ապրիլյան պատերազմական գործողությունների ժամանակ ծանր վիրավորում ստացած Արման Լազգիյանը բուժումը շարունակում է Համբուրգի  «Asklepiosklinik Barmbek Hamburg» կլինիկայի ինտենսիվ բաժանմունքում:

«Ժողովրդական լեզվով ասած, Գերմանիայի օդը երևի Արմանի վրա եկավ, շատ արագ սկսեց ապաքինվել, երկրորդ օրը նրան թույլ տվեցին, որ Արմանը ջուր խմի, հաջորդ օրը համոզվեցին, որ կերակրափողի ու շնչափողի հետ կապված խնդիր չկա և սկսեցին թույլ տալ, որ ուտի», -Panorama.am-ի թղթակցի հետ զրույցում ներկայացրեց Համբուրգից վերադարձած Միքայել Լազգիյանը՝ Արմանի հայրը:

Պատմում է՝ որդին խոսում էր իրենց հետ, ժպտում էր: Թոքերի ջուրը նույնպես հեռացվել է, ստամոքսից, աղիքներից խողովակները հանվել են: «Կարճ ասած՝ վերքերը լավանում են», -ասաց հայրը:

Արմանի մոտ մնում է լուծել ողնուղեղի հետ կապված խնդիրը, ինչի պատճառով նա չի կարողանում շարժել ստորին վերջույթները:

«Միայն ձեռքերն է շարժում, ոտքերը չեն շարժվում: Հուսով ենք, որ Գերմանիայում սկսել է ապաքինվել դրանք էլ արագ ընթացք կստանան», -ասաց Լազգիյանը:

Ողնուղեղի հետազոտության արդյունքներից հետո պարզ կլինի, թե որքան գումար է անհրաժեշտ խնդիրը լուծելու համար: Ըստ Միքայել Լազգիյանի, նախնական տվյալներով այդ գումարի թիվը կարող է հասնել մինչև 100 հազար եվրո:

Ասում է՝ սկզբում Երևանում, հետո Համբուրգում շատ են զգացել հայ ժողովրդի աջակցությունը, ինչի համար իրենք երախտապարտ են: Նրա խոսքով, Համբուրգում գերմանահայերը կիլոմետրեր էին կտրում-անցնում, որպեսզի Արմանին տեսակցության գան:

Մինչ այժմ Արմանի բուժման ծախսերը հոգացել են անհատներ՝ վարչապետ Աբրահամյանը, պաշտպանության նախարարը, առողջապահության նախարարը ու շատ բարեգործներ: Բայց կառավարությունը գումարներ չի հատկացրել:

«Ես խնդրում եմ փոխանցեք, թող բոլորն իմանան՝ կառավարությունը, պետությունը մեզ չի օգնել: Մեզ օգնել են առանձին մարդիկ: Վիրավորական է՝ կամ պետություն գոյություն չունի, կամ պետությունը արհամարած ունի զինվորին, վիրավորին, մահացածին՝ ծանր-թեթև կապ չունի: Զինվորը գնացել էր հայրենիքը պաշտպանելու», -նշեց Լազգիյան ավագը: