Ձեր վստահելի աղբյուրը

Մեկնարկում է զինվորներին ուղղված «Մենք մեր զինվորի կողքին ենք» բարեգործական երրորդ ծրագիրը: Այս մասին այսօր լրագրողների հետ հանդիպմանը հայտնեց Արարատյան Հայրապետական թեմի տեղեկատվական բաժնի հոգևոր պատասխանատու  Տ. Եսայի քահանա Արթենյանը:

«Բոլորիս ուշադրության կենտրոնում այսօր մեր զինվորներն են և յուրաքանչյուր մարդ փորձում է իր օգնությունը բերել հայրենիքի պաշտպանության սրբազանագ գործին: Արդեն երրորդ տարին է իրականացվում է այս ծրագիրը, որի շրջանակում ինչպես նախորդ տարիներին, այնպես էլ այս տարի հավաքվել է  50 մլն դրամ»,-նշեց Տ. Եսայի քահանա Արթենյանը:

Հանդիպմանը ներկա Արարատյան Հայրապետական թեմի բարեգործական ծրագրերի համակարգող Շուշան Պետրոսյանը նշեց, որ այս տարվա գումարը կտրամադրվի 2015թ. հունիսի 1-ից մինչև ապրիլի մարտական գործողությունների ընթացքում ՀՀ-ից և ԼՂՀ-ից զոհված և վիրավորված զինվորների ընտանիքներին: Օգնությունը տրամադրվում է ՀՀ պաշտպանության նախարարության սոցիալական վարչության տրամադրած ցուցակով:

ԱՀԹ բարեգործական ծրագրերի համակարգողը տեղեկացրեց, որ «Մենք մեր զինվորի կողքին ենք»  ծրագիր մեկնարկել է 2014 թվականին, երկու տարիների ընթացքում 662ընտանիքի բաշխվել է 100 մլն դրամ, այս տարի 50 մլն դրամ կբաշխվի 100 ընտանիքի: