Ձեր վստահելի աղբյուրը

«Մեծ տերությունները, ովքեր փորձում են Թուրքիայի հետ ինչ-ինչ խնդիրներ լուծել, շահարկել են և շահարկելու են Հայոց ցեղասպանության հարցը: Անկախ մեր կամքից է կատարվում Հայոց ցեղասպանության փաստի ճանաչումը: Նման պայմաններում մենք պետք է այնպես անենք, որ այդ շահը համապատասխանեցնենք մեր ազգային շահերին»,- լրագրողների հետ հանդիպման ժամանակ ասաց  ՀՀ ԳԱԱ Պատմության ինստիտուտի Հայկական հարցի և Հայոց ցեղասպանության պատմության բաժնի վարիչ  Արմեն Մարուքյանը:

Նա շեշտեց, որ ցանկացած երկիր, որը ճանաչում, դատապարտում է Հայոց ցեղասպանությունը, առաջին հերթին առաջնորդվում է իր պետական շահերով, այդ խնդիրն օգտագործում է իր շահերից ելնելով:

Խոսելով Բունդեսթագի կողմից ընդունված բանաձևի մասին, Ա.Մարուքյանը նշեց, որ դեռևս 2005 թվականի շրջանառության մեջ դրված բանաձևի համեմատությամբ 2016-ի բանաձևում դրական տեղաշարժ կար. «2016 թվականի բանաձևում հստակ անվանում են Հայոց ցեղասպանություն: Սա շատ կարևոր տեղաշարժ էր, ինչն էլ ավելի շատ է նյարդայնացրել թուրքական կողմին»:

«Նմանություններ կան, մասնավորապես, ամրագրված է Գերմանիայի մեղսակցության պահը: Բանաձևում կա նաև երկիմաստ ձևակերպումներ, որոնք կարող են կամային մեկնաբանությունների տեղիք տալ»,- ասաց  Ա.Մարուքյանը:

Նա նշեց, որ բանաձևում խոսվում է հայ-թուրքական արձանագրությունները վերակենդանացնելու, երկու ժողովուրդների հաշտեցման, ներման մասին:

«Գերմանիան՝ մի երկիր, որը ճանաչել է Հոլոքոստը, 1952 թվականից Լյուքսեմբուրգյան համաձայնագրով առ այսօր հատուցում է այդ հանցագործության համար, իր բանաձևում բացարձակապես չի խոսում հատուցման մասին, որ Թուրքիան, իբրև նույնաբովանդակ հանցագործություն կատարած պետություն,  պետք է հատուցի: Հատուցման գաղափարը սկզբունքորեն բացակայում է: Ցանկալի կլիներ, որ ակնարկ լիներ այդ մասին և որպես օրինակ բերվեր հենց Գերմանիան»,- ասաց նա՝ հավելելով, որ Հայոց ցեղասպանության ճանաչման, դատապարտման այս ակտը գերմանացի պատգամավորների մտքում ավարտվում է միայն բարոյական հարթության վրա՝ ճանաչում, ներում սխեմայով:

«Ինչո՞ւ ունեցանք նման բանաձև: Հայկական կողմը տեքստի վրա որևէ ազդեցություն չի ունեցել: Հայկական կողմ ասելով նկատի ունեմ Հայաստանի դիվանագիտական ներկայացուցչությունները, Գերմանիայում հայկական համայնքը, Հայ դատի  հանձնախմբերը: Սա վկայում է այն մասին, որ մենք շարունակելու ենք ունենալ նման ձևակերպումներով բանաձևեր, քանի դեռ չենք աշխատում այդ բանաձևերի նախապատրաստական փաստաթղթերի վրա, չենք փորձում այդ փաստաթղթերում ներառել այնպիսի տեսակետներ, գաղափարներ, որոնք բխում են  հայկական կողմի շահերից»,- նշեց նա:

Ա.Մարուքյանի խոսքով, այսօր գնալով սեղմվում է Թուրքիայի շուրջ օղակը, հակասությունները Թուրքիայի և այլ երկրների միջև սրվում են: Նման պայմաններում, ըստ նրա, հենց Հայաստանից է կախված թե ինչպես կարող է այդ հարաբերությունների վատթարացումն օգտագործել կամ չօգտագործել: