Ձեր վստահելի աղբյուրը

Գերմանիայի Բունդեսթագի կողմից ընդունված բանաձևի պրակտիկ օգուտը հայկական կողմին կարող է լինել այն, որ անմիջապես մշակվի Գերմանիայի կողմից Հայոց ցեղասպանության ժխտումը քրեականացնող օրինագիծ և շրջանառության մեջ դրվի Բունդեսթագում,- լրագրողների հետ հանդիպման ժամանակ ասաց  ՀՀ ԳԱԱ Պատմության ինստիտուտի Հայկական հարցի և Հայոց ցեղասպանության պատմության բաժնի վարիչ  Արմեն Մարուքյանը:

«Երկաթը պետք է տաք-տաք ծեծել»,- ժողովրդական խոսքը հիշեցրեց նա:

Ըստ Ա.Մարությանի, քանի դեռ տրամադրվածություն կա, գերմանա-թուրքական հարաբերություններում լարվածությունը մեծացել է՝ ամենակարճաժամկետ օգուտը, որ կարող է ստանալ հայկական կողմը, Բունդեսթագի կողմից համապատասխան օրենքի ընդունումն է:

«Սա շատ տրամաբանական կլինի, որ եթե Գերմանիան համարում է ցեղասպանություն է տեղի ունեցել, ուրեմն պետք է քրեականացնի այդ Ցեղասպանության ժխտումը, ինչպես Հոլոքոստի պարագայում է»,- նշեց նա: 

Ա. Մարուքյանի խոսքով, նման օրենքը կարևոր է հատկապես Գերմանիայի համար, որտեղ բնակվում է 3-3,5 միլիոն թուրք բնակչություն, որը  Թուրքիայի հրահրմամբ մշտապես ժխտում է Հայոց ցեղասպանությունը:

«Սա պետք է նախաձեռնվի մեր կողմից, հասցվի այն պատգամավորներին, ովքեր համարյա միաձայն  քվեարկել էին Հայոց ցեղասպանության ընդունման բանաձևի օգտին»,- ասաց պատմաբանը:  

Ըստ նրա, Գերմանիայում Հայկական հարցի, ցեղասպանության ուսումնասիրության կենտրոնը կարող է նախապատրաստել նման նախագիծ, որպես օրինակ վերցնել Ֆրանսիայի նույն օրենքը, թարգմանել գերմաներեն և պաշտոնական նամակով դիմել Բունդեսթագի ղեկավարությանը, իսկ հայկական դիվանագիտությունն էլ պետք է պաշտպանի այդ առաջարկը:

Ա. Մարուքյանն ընդգծեց, որ ամեն ինչ պետք է արագ անել, այլապես գործընթացը կարող է սառեցվել, ինչպես, օրինակ Ռուսաստանի Դումայում:  Նա  հիշեցրեց, որ 2015-ի վերջին, երբ  թուրք-ռուսական լարված հարաբերությունները հասել էին գագաթնակետին, «Սպրավեդլիվայա Ռոսիա» խմբակցության կողմից Հայոց ցեղասպանության  ժխտումը քրեականացնող օրինագիծը մտցվեց Դումա, սակայն հիմա գործընթացը քնած է:

«Եթե գերմանացիներն իսկապես առաջնորդվում են ժողովրդավարական արժեքներով, մարդասիրությամբ, պարտավոր են այս օրինագիծն ընդունել: Կարող է և չընդունեն, բայց մենք պետք է փորձենք»,- ասաց բանախոսը:

Ըստ Ա.Մարուքյանի, Հայաստանը չպետք է սպասի, թե էլ ով կցանկանա Թուրքիային ապտակ  հասցնելու համար ճանաչել Հայոց ցեղասպանությունը և  դիտորդի կարգավիճակում ծափահարի, դեսպանատան դեմ շնորհակալություն հայտնի:

«Մեզանից շատ բան է կախված: Մեծ ռեսուրսներ, ջանքեր չեն պահանջվում: Այսօր բարենպաստ իրավիճակ է ստեղծվել»,- նշեց ՀՀ ԳԱԱ Պատմության ինստիտուտի Հայկական հարցի և հայոց ցեղասպանության պատմության բաժնի վարիչ  Արմեն Մարուքյանը: