Հռոմի Պապի այցից առաջ վերականգնվում են Մայր Տաճարի որմնանկարները

Հասարակություն 10:57 13/06/2016 Հայաստան

Հռոմի Պապի այցից առաջ վերականգնվում են Մայր Տաճարի որմնանկարները

Սուրբ Էջմիածնի Մայր Տաճարի վերանորոգման, ամրակայման արտաքին աշխատանքները մինչև Հռոմի Պապի՝ Հայաստան կատարելիք այցը չեն ավարտվի: Այս մասին Panorama.am-ին հայտնեց Մայր Աթոռ սուրբ Էջմիածնի տեղեկատվական համակարգի ղեկավար Տեր Վահրամ քահանա Մելիքյանը:

«Արտաքին երկաթյա կաղապարները Պապի այցի ընթացքում էլ կշարունակեն մնալ»,-ասաց Տեր Վահրամը:

Տաճարի ներսում միաժամանակ ընթանում են որմնանկարների թարմացման ու մասնակի վերանորոգման աշխատանքներ:

«Ներքին աշխատանքները մինչև հունիսի 24-ը կավարտվեն»,-ասաց նա:

«Շողակաթ» հեռուստաընկերությունն ավելի վաղ տեղեկացրել էր, որ Սուրբ Էջմիածնի Մայր Տաճարի որմնանկարների վերականգնման աշխատանքը հանձն է առել որմնանկարների վերականգնման գիտահետազոտական կենտրոնը:

Կենտրոնի ավագ մասնագետ Արժանիկ Հովհաննիսյանի գնահատմամբ, որմնանկարները լավ վիճակում են, վնասված մասերը քիչ են: Կատարվում են մրի շերտի հեռացում, ներկի ամրակայում, թափված հատվածների լրացում, նախկինում կատարված գունային լրացումների գունափոխման ուղղումներ, որմնանկարների հիմքի վթարային հատվածների ամրակայում:

Այս պահին ռեստավրացիոն աշխատանքներ են իրականացվում նաև Խոր Վիրապում: Նորին Սրբության այցի ծրագրի համաձայն, հունիսի 26-ին Հռոմի Սրբազան Քահանայապետ Ֆրանցիսկոս Պապը և Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը աղոթք կմատուցեն Խոր Վիրապի վանքում:

Հիշեցնենք՝ Հռոմի Սրբազան Քահանայապետ Ֆրանցիսկոս Պապի Հայաստանի Հանրապետություն այցը կմեկնարկի ս.թ. հունիսի 24-ին:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: