Ձեր վստահելի աղբյուրը

Ազգային Ժողովի շենքի դիմաց բողոքի ակցիա է ընթանում: Հավաքված քաղաքացիները դեմ են «Հայաստանի ու Ռուսաստանի միջև հակաօդային պաշտպանության միավորված համակարգ ստեղծելու» համաձայնագրի ընդունմանը:

«Դավաճանության հերթական քայլը», «Չենք հանձնելու ոչ օդը, ոչ հողը», «ՀՕՊ-ի հանձնումը=Ստեփանակերտի ռմբակոծում», «Մենք չենք վստահում պերմյակովների բանակին, մենք վստահում ենք հայոց բանակին» այս ու այլ գրություններով ցուցանակներ են ԱԺ շենքի առաջ բարձրացրել ակցիայի մասնակիցները:

Համաձայանգրի դեմ բողոքի դուրս եկած ԱԻՄ առաջնորդ Պարույր Հայրիկյանը նշեց, որ նման համաձայանգրի քննարկումը նշանակում է, որ Հայաստանի իշխանությունները տեղի ունեցած իրադարձություններից եզրակացություններ անելու ընդունակ չեն:

Հայրիկյանի խոսքով, նման ակցիայի անցկացումը վկայում է այն մասին, որ հասարակության մեջ առկա առողջ տարրը նպաստելու է քաղաքակրթական վերածննդին:

«Եթե չլինեին ապրիլյան դեպքերը, ապա կարելի էր մտածել, որ Հայաստանն այս համաձայնագրով կարող էր շահեկան վիճակում լինել: Բայց մենք գործ ունենք այնպիսի վիճակի հետ, որ Հայաստանին սպառնացող պետություն կա, որի հիմնական սնուցողն ու իրեն ռազմավարական դաշնակից համարողը Ռուսաստանն է: Եթե այդ ամենից հետո դու շարունակում ես Ռուսաստանի հետ ոչ միայն հարաբերություններ պահպանել, այլև հավատում ես նրա բարյացակամությունը, ուրեմն այդ հետևանքները դու պետք է վայելես»,-ասաց Հայրիկյանը:

Նշենք, որ ԱԺ արտահերթ նիստի օրակարգում համաձայնագիրն ընդգրկված չէ:

Մանրամասները՝ տեսանյութում: