ՀՕՊ համաձայնագրի ընդունման համար ժամկետներ չկան. Իշխանական պատգամավոր

Քաղաքական 13:21 13/06/2016

ՀՕՊ համաձայնագրի ընդունման համար ժամկետներ չկան. Իշխանական պատգամավոր

Հայաստանի և Ռուսաստանի միջև ռազմական ոլորտին վերաբերող համաձայնագրի ընդունման համար չկան ժամկետներ: Այդ մասին այսօր հայտարարեց ԱԺ Հանրապետական խմբակցության ղեկավար Վահրամ Բաղդասարյանը:

Հիշեցնենք՝ համաձայնագիրը, որի անվանումն է՝ «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» կողմերի միջև ստորագրվել է 2015 թվականի դեկտեմբերի 23-ին: Հայաստանի Ազգային ժողովի արտաքին հարաբերությունների մշտական հանձնաժողովում համաձայնագիրը դրական եզրակացություն էր ստացել և ընդգրկվել էր ԱԺ նիստի օրակարգ:

Այսօր ԱԺ-ի դիմաց բողոքի ակցիա էր կազմակերպվել, որի անդամները հայտարարում էին, թե համաձայնագրի կնքումը «դավաճանություն է», մինչդեռ ԱԺ արտահերթ նիստի օրակարգում հարցն ընդգրկված չէ:

«Ձեր երևակայությունն է դա պարզապես, որ հարցը շտապ է, մեկ օրվա, երկու օրվա հարց է»,- նկատեց Բաղդասարյանը:

Հարցին, թե այսինքն՝ Ռուսաստանը ժամկետներ չի՞ դրել այդ համաձայնագրի ընդունման համար, իշխանական պատգամավորը պատասխանեց.

«Մեր ժամկետները որոշում ենք մենք, ես խնդրում եմ այդ բանը մի քիչ հղկեք: Եթե կլինի անհրաժեշտություն, դրա մասին տեղյակ կպահենք, մենք չենք շտապում, դուք եք շտապում»:

Հիշեցնենք, որ ԱԺ արտաքին հարաբերությունների մշտական հանձնաժողովի նիստում ներկայացնելով փաստաթուղթը, ՀՀ Պաշտպանության փոխնախարար Արա Նազարյանը տեղեկացրել էր, որ «այս համաձայնագիրը ՀՀ ռազմապաշտպանական ոլորտին առնչվող համաձայնագիր է, ունի ռազմավարական կարևոր նշանակություն»:

«Մեր հակաօդային պաշտպանության համակարգերն ունենք, գործում են, բայց խոսքը գնում է Ռուսաստանի հետ համատեղ գործողությունների մասին, այդ միջոցների օգտագործման մասին», -ասել էր պաշտոնյան:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: