Ձեր վստահելի աղբյուրը

Պետական եկամուտների նախագահի տեղակալ Վախթանգ Միրումյանը այսօր Ազգային ժողովի արտահերթ նիստում անկեղծացավ և հայտարարեց, որ գործարարներն ու փոքր և միջին ձեռնարկատերերը դժգոհ են Հարկային օրենսգրքի նախագծով նախատեսվող շրջանառության հարկի նվազեցման նախաձեռնությունը:

«Հարցը, այո, քննարկվել է գործարարների, ՓՄՁ ներկայացուցիչների հետ և շեմի նվազեցման հետ՝  վերջինների դիրքորոշումը եղել է բացասական»,- հայտարարեց Միրումյանը՝ պատասխանելով ԱԺ «Օրինաց երկիր» խմբակցության պատգամավոր Իշխան Խաչատրյանի հարցին:

Պատգամավորը նախ հետաքրքրվեց, թե ինչ կարծիք ունեն այդ նախաձեռնության վերաբերյալ գործարարները հետո հարցրեց, թե շրջանառության հարկի շեմի նվազեցման դեպքում արդյոք հնարավո՞ր է հրապարակել, թե քանի տնտեսվարող կարող է այդ դաշտում աշխատել:

Ի պատասխան Միրումյանն ասաց, որ եթե շրջանառության հարկը 115-ից իջեցվում 40 մլն դրամ, ապա, 2016 թվականի 1-ին եռամսյակի տվյալներով, 2100 տնտեսվարող սուբյեկտներ կհայտնվեն շրջանառության հարկի դաշտում, իսկ շուրջ 50 հազար տնտեսվարող սուբյեկտներ կշարունակեն աշխատել շրջանառության հարկի դաշտում:

«Հարկային օրենսգրքի նախագիծն այն փաստաթուղթն է, որի շուրջ մտահոգություններ չեն կարող չլինել: Փաստաթուղթը շատ հավասարակշռված փաստաթուղթ է, և հարկային բեռի վերաբաշխումը ինքնին ենթադրում է, որ եթե որոշ հարկատեսակների մասով կան ազատականացումներ, դրույքաչափերի վերացումներ, ապա բնականաբար լինելու են նաև վերանայումներ այլ հարկատեսակների մասով, որպեսզի մենք ամբողջ մոդելը հավասարակշռենք», -այսօր նոր Հարկային օրենսգրքի նախագծի քննարկման ժամանակ հայտարարեց պաշտոնյան:

Արձագանքելով Միրումյանին, Խաչատրյանը նկատեց, որ ցավալի է, երբ գործարարները դեմ են եղել շրջանառության հարկի մասին կառավարության նախաձեռնությանը, բայց օրինագիծն այդ տեքստով ներկայացվում է խորհրդարան: