Ձեր վստահելի աղբյուրը

Ազգային ժողովի դատին ներկայացված Հարկային նոր օերնսգրքի նախագծով Հայաստանում նոր գնաճի խթան է ստեղծվում: Այս եզրահանգման է եկել ԱԺ պատգամավոր Նիկոլ Փաշինյանը:

Նման հայտարարության համար հիմք էր նախագծով տարբեր ապրանքատեսակների համար ակցիզային հարկի փոփոխվող դրույքաչափերը:

«Ակցիզային հարկի դրույքաչափեր եք փոխում ու դրա արդյունքում բենզինի էական գնաճ է լինելու, լիցքավորվող գազի, սպիրտային խմիչքների, ծխախոտի էական գնաճ է լինելու: Ծխախոտը դեռ մի կերպ հասկանալի է, թող մարդիկ քիչ ծխեն: Ամեն անգամ ասում ենք՝ հա լավ ինչ է, մի հազար դրամ ենք ավելացնում հարկային բեռը, բայց 1000 օրենքով հազար դրամով ավելացնում ենք, ու ամեն մարդու վրա մեծ բեռ ենք դնում, որի տակից ինքը ո՞նց է դուրս գալու», -այսօր ԱԺ նիստում ՊԵԿ փոխնախագահ Վախթանգ Միրումյանից հետաքրքրվեց պատգամավորը:

Ի պատասխան Վախթանգ Միրումյանը տեղեկացրեց, որ օրինագծով կառավարությունն առաջարկում է մինչև 2021 թվականը բարձրացնել և ներդաշնակեցնել միայն օղու և ծխախոտի ակցիազային հարկի դրույքաչափերը:

«Խոսքը չի վերաբերում բոլոր ալկոհոլային խմիչքներին, որովհետև գինու և կոնյակի մասով մենք առաջարկում ենք չբարձրացնել ակցիզային հարկի դրույքաչափերը, և ասվածը վերաբերում է բացառապես օղուն և ծխախոտի արտադրանքին: Իհարկե, հարկի դրույքաչափերի բարձրացումը ենթադրում է գների բարձրացում: Ակցիզային հարկի դրույքաչափերի բարձրացման նպատակը հենց այդ ապրանքների գների բարձրացումն է, որովհետև դրանով պետությունը չի խրախուսում այս ապրանքատեսակների՝ ծխախոտի և օղու սպառումը», -լրացրեց Վախթանգ Միրումյանը:

Անդրադառնալով վառելիքին, Միրումյանն ասաց, որ մասնավորապես,  դիզելային վառելիքի ակցիզային հարկի դրույքաչափը նվազեցվելու է՝ 35 հազար դրամից 13 հազար դրամ:

«Պատճառն այն է, որ դիզելային վառելիքի մասով մենք կրճատում ենք ավելացված արժեքի հարկից ազատվելու արտոնությունը: Հայաստանն աշխարհում առաջին երկիրն է, որը դիզելային վառելիքի իրացումը չի հարկում ԱԱՀ-ով, ինչը չի նպաստում տնտեսության այնպիսի ոլորտների գործունեությանը, ինչպիսին են շինարարությունը, հանքարդյունաբերությունը այն առումով, որ այդ ոլորտների ծախսերում էական մաս է կազմում դիզելային վառելիքի սպառումը և պարզապես ԱԱՀ-ի հաշվանցման հնարավորություն չկա: Դրա համար կրճատելով դիզելային վառելիքի ԱԱՀ-ից ազատման արտոնությունը 20 տոկոս դրույքաչափով հարկելը և որպեսզի գների ավելացումները մեղմվեն, մենք առաջարկել ենք դիզելային վառելիքի մասով ոչ թե իրականացնել դրույքաչափի բարձրացում, այլ նվազեցում», -ներկայացրեց ՊԵԿ փոխնախագահը:

Ինչ վերաբերում է բենզինի և սեղմած գազի ակցիզային հարկի դրույքաչափերին, ապա կառավարությունը ներկայացրած նախագծով առաջարկում է ավելացում, ինչի արդյունքում, Միրումյանը չբացառեց բենզինի և սեղմած գազի գնաճը:

«Տեսականորեն և գործնականորեն հնարավոր են գների տատանումներ, բայց կարծում եմ՝ անհրաժեշտ է ուշադրություն դարձնել, որ հնարավոր է նաև, որ դա իրականացվի համապատասխան մարժայի հաշվին, որ գների բարձրացման չբերի», -նշեց Միրումյանը:

Արձագանքելով կառավարության պաշտոնյային, Փաշինյանը նկատեց, որ օրինակ, գազալցակայաններում, որոնք կապված են օլիգարխիայի հետ, զգալի ստվեր կա՝ ՀԴՄ չի դրվում, չի կշռվում գազը և այլն, և դա վերացնելու փոխարեն ակցիզային գներն են բարձրացվում:

«Ակցիազային հարկի դրույքաչափի բարձրացման ադրյունքում էդ ձախ եկամուտներ տնօրինողի եկամուտներն են շատանալու: Արդյունքում պարզվելու է, որ հարուստներն ավելի են հարստանալու»,- նկատեց Փաշինյանը: