Ձեր վստահելի աղբյուրը

Հայաստանում աղքատությունը կշատանա՞, թե՞ կփոքրանա,-Ազգային ժողովում Հարկային օրենսգրքի  նախագծի քննարկումների ժամանակ նման հարցադրումով սկսեց իր ելույթը ԱԺ ՀՀԿ խմբակցության անդամ, ԱԺ սոցիալական հարցերի մշտական հանձնաժողովի նախագահ Հակոբ Հակոբյանը:

«Տնտեսության երեք տոկոս աճը մեկ տոկոս աղքատության կրճատում է նշանակում: Աշխատող այն 400 հազար մարդը, որի մասին խոսում ենք՝ եկամուտները մինչև 215-220 հազար դրամ, չի փոխվելու, մնալու է նույնը եկամտահարկի փոփոխության դեպքում: Սա ի՞նչ է տալիս մեզ, որ ամբողջ աշխարավարձի շեմը կգնա դեպի ներքև՝ մինչև 220 հազար, չի կարող հակառակը լինել, որովհետև երբ որ մենք 36 տոկոս էինք գանձում աշխատավարձից, սկզբում ունեինք  2000-3000 հարկատու, հետո դարձավ 200: Մեր երկիրը սպասարկման երկիր է, ոչ թե արտադրության, արտադրության մեջ չի կարելի աշխատավարձը թաքցնել, բայց սպառման ոլորտում աշխարհի բոլոր երկրներում կա: Այն ֆիսկալ հաշվարկը, որ մենք պետք է հավաքենք՝ 70-80 միլիարդ, երբեք չենք հավաքելու: Առաջին տարին 45-50 միլիարդ կհավաքենք, երկրորդ տարին աճ չի կարող լինել, երրորդ տարին կգնա նվազում: Կստացվի, որ աղքատության շեմին մոտ 400 հազար աշխատող մարդ կլինեն վտանգավոր գոտում: Հետևաբար այս օրենսգիրքը չի նպաստում աղքատության հետ կապված խնդրի լուծմանն անկախ այն բանից, թե տնտեսությունը աճ կունենա, թե չի ունենա»,- ասաց նա:

Ըստ Հ. Հակոբյանի, վերջերս նկատվում է, որ սպառումը պակասում է, ինչը բերում է տնտեսության չզարգացմանը, ապա՝  ինչպե՞ս են հարկային բեռն ավելացնում սպառման պակասեցման պարագայում.  «Սա իմ համար անհասկանալի է»:

Հ. Հակոբյանը հարցով դիմեց նաև հիմնական զեկուցող Պետական եկամուտների կոմիտեի նախագահի տեղակալ Վախթանգ Միրումյանին. «Երբ որ, պարոն Միրումյան, հիմնավորում եք և ճիշտ եք հիմնավորում, որ 115 հազար ավելացված արժեքի հարկի արտոնությունների դեպքում շուկայում անհավասարություն է ստեղծվում, ապա իմ հարցը հետևյալն է, արդյո՞ք այդ անհավասարությունը, որ գտել եք այստեղ, ուրիշ տեղեր չկան, որ չեք անդրադառնում: Ամենամեծ անհավասարությունը քառասուն տոկոս գնային տարբերությամբ սկսվում է սահմանի վրա, երբ նույն ապրանքը մեկի համար կարող է հսկիչ գին դառնալ՝ գին պլյուս քսան տոկոս, մյուսի համար՝ գին մինուս քսան տոկոս: Երբ խոսում եք անհավասարության մասին և ուզում եք օրենսգրքով հարկային հավասար դաշտ մտցնեք, ապա անդրադարձեք բոլոր տեղերը:

Մենք ուզում ենք՝ Հայաստանի  պետական բյուջեն ավելի եկամուտներ մտնի: Փող ումից են վերցնում՝  աշխատող մարդուց: Ուզում եք՝ քամեք, ուզում եք՝ մի քամեք, բայց փողը պետք է վերցնել աշխատող մարդուց։ Եթե ուզում եք աշխատող մարդիկ շատ լինեն, օրենսգրքի խնդիրն է, պետք է լինի հավասարություն՝ չաշխատող մարդը հարկ չի տալիս:

Այս օրենսգրքի հիմնական նպատակը պետք է լինի շատացնել աշխատողներն:

Մենք  դա անո՞ւմ ենք այս օրենսգրքով: Ոչ:

Այն տրամաբանությունը, որ դրել եք՝ եկամտահարկը 28 տոկոս, շահութահարկը 20 տոկոս, դիվիդենտից գանձումը 5 տոկոս՝ չի աշխատելու: Գործատուին ձեռք է տալիս  28 տոկոսի փոխարեն վճարել 20  պլյուս 5 տոկոս: Սա է տրամաբանությունը, որ դրված է օրենսգրքում: Չի աշխատելու: Իմ հաշվարկներով, դիվիդենտի գանձումից առաջացող հարկային մուտքը կարող է լինել մաքսիմում 1,5 միլիարդ: Սկզբի համար, հետո ավելի քիչ կլինի: Լավ,  արժի՞ այդ 1,5 միլիարդի համար Հայաստանի դարձնել դիվիդենտը հարգող պետութուն: Իրապես չարժի»:

Պատգամավորը նաև հարց բարձրացեց, թե ինչո՞ւ հարկատուին չեն հարգում, ցանկացած քայլի՝  50 տոկոս ավելի վճարեք, այսքան տույժ ու տուգանք վճարեք. «Ո՞րն է պատճառը: Չի լինի՝ դուք գնաք աշխատեք, մենք գանք հարկային էլ հիմա»։

ՀՀԿ-ական պատգամավորը նաև ասաց, որ ամեն ինչ հսկողության տակ է, պետք է թեթևացնել հարկային ստուգումները և մարդկանց պարզ ասել՝ «սա քոնն է, սա մերն է»:

Հակոբ Հակոբյանի խոսքով, օրենսգրքում ահագին դրական բաներ կան, բացասականները եթե հանեն, դրականների արդյունքով  կարող են ունենալ լավ օրենսգիրք:

Մանրամասները՝ տեսանյութում: