Ձեր վստահելի աղբյուրը

Հայաստանում 615 հազար վարձու աշխատող կա, այսինքն՝ նրանք մարդիկ են, ովքեր ստանում են աշխատավարձ և վճարում են եկամտահարկ: Այսօր Ազգային ժողովում վկայակոչելով Պետական եկամուտների կոմիտեի տրամադրած տվյալները՝ հայտարարեց ԱԺ պատգամավոր Նիկոլ Փաշինյանը:

Շարունակելով ներկայացնել տվյալները՝ պատագամավորն ասաց, որ 615 հազար աշխատողներից 254 հազարը պետական բյուջետային հիմնարկների աշխատողներ են, որոնք, ըստ էության, առաջնային հարկատու չեն: Իսկ մնացած 361 հազարը առաջնային ու ակտիվ հարկատու են համարվում:

«Ստացվում է, որ Հայաստանում ակտիվ հարկատու կամ առաջնային հարկատու հանդիսացող 361 հազար մարդ կա գումարած շուրջ 54 հազար ակտիվ ձեռներեցները: Այսինքն՝ այս 410 հազարն այն մարդիկ են, որոնց գործունեության արդյունքում ձևավորվում են մեր պետական եկամուտների հհիմնական մասը: Հիմա, փոխանակ, էս պետությունը այդ մարդկանց փայփայի, ամեն ինչ անի, որ նրանց թիվը ավելանա, հակառակն է անում՝ տարեց տարի նրանց թիվը նվազում է, իսկ նրանց վրա ընկած հարկային բեռը՝ ավելանում», -ԱԺ արտահերթ նիստում Հարկային նոր օրենսգրքի քննարկման ժամանակ հայտարարեց Փաշինյանը:

Ավելին, ըստ պատգամավորի 361 հազար հարկատուների «վզին դրված է» 525 հազար թոշակների թոշակը վճարելու հոգսը, 2018-ի հունվարից՝ կենսաթոշակների բեռը:

«Այսինքն այս շուրջ 400 հազար մարդուն մեր պետությունը դրել ու լավ քամում է, քամում է: Արդյունքում՝ արտագաղթի տեմպերի աճ, գործազրկության մակարդակի աճ» , -հավելեց պատգամավորը՝ ընդգծելով, որ աշխատողների նվազագույն աշխատավարձը կազմում է 70 հազար դրամ:

Փոխարենը, պատգամավորի խոսքով, հարկատուն ստանում է ակցիզային հարկերի բարձրացման մի մեծ խմբաքանակ և այդ հարկի բարձրացման արդյունքում թանկանալու է ծխախոտը, օղին, բենզինը, դիզվառելիքը, գազը:

«Մի հատ էլ կառավարությունը հպարտանում է, թե ալկոհոլային խմիչքների վաճառքը չեն խրախուսում, այսինքն՝ այս մարդիկ նոր տարի չեն անելո՞ւ, այսինքն՝ այս մարդիկ իրենց տանը ծնունդ չեն անելո՞ւ, այսինքն՝ այս մարդկանց տուն մի օր հյուր չի մտնելու, որի դեմ մի շիշ արաղ դնե՞ն: Պետությունով ընգել եք էդ մի շիշ արաղի հետևից, պայքարում եք, որ հանկարծ էդ մի շիշ արաղն էլ չլինի », -դիմելով Միրումյանին նշեց Փաշինյանը:

Բացի սպասվող գնաճից, Հարկային նոր օրենսգրքի նախագծում Փաշինյանը մեկ այլ խնդիր էլ է նկատել՝ ստուգող մարմնի կողմից տուգանված գործարարը չի կարող բողոքարկել տուգանքի մասին ակտիվ: Փաշինյանը ենթադրում է, որ այս ամենն արվում է այն պատճառով, որ ֆինանսական միջազգային կազմակերպություններն են պարտադրում Հայաստանի կառավարությանը նման օրենսգիրք ընդունել:

«2020 թվականին Հայաստանի արտաքին պարտքի միայն սպասարկումը լինելու է 1 մլրդ դրամ, հիմա էլ հայաստանի կառավարությունը շարունակում է ակտիվորեն պարտքեր վերցնել, և միջազգային կազմակերպություններն էլ ուզում են հավաստիանան, որ ինչպես Միրումյանն է ասում, հարկաբյուջետային կայունություն կա, որ պարտքը վերցնողները ի վիճակի կլինեն պարտքը վերադարձնել», -իր հայտարարությունը հիմնավորեց Փաշինյանը: