Ձեր վստահելի աղբյուրը

Ֆինանսական միջոցներից զրկված, անելանելի վիճակում գտնվող  մոտ 550  հալեպահայ սպասում է իր հերթին՝ րոպե առաջ հեռանալու ռմբակոծվող Հալեպից:  «Հալեպ հայրենակցական բարեսիրական» կազմակերպության անդամները դրամահավաք  են նախաձեռնել, ամեն օր սպասում են բարերարների նվիրատվությունների, որպեսզի կարողանան հայրենակիցներին ապահով կերպով Երևան տեղափոխել:

Հալեպում գտնվող մեր հայրենակիցները նախ հատում են Սիրիայի սահմանը, հասնում Լիբանան, այնտեղից էլ՝ Երևան: Հայաստան հասնելու համար մեկ մարդու ճանապարհածախսը կազմում է մոտ 500 դոլար:

Կազմակերպության համահիմնադիր Անի Բալխյանը Panorama.am-ին ասաց, որ հերթագրված մարդկանց մեծ մասը երեխաներ են, պատանիներ, այրիացած կանայք: Վերջին օրերին Հալեպում ակտիվացած ռազմական գործողությունների ընթացքում կազմակերպության միջոցներով 25 հալեպահայ է տեղափոխվել այստեղ: Հալեպից մեծ հոսք է սկսվել նաև Սիրիայի ծովափնյա բնակավայրեր, որոնք այս պահին առավել անվտագ ու ապահով են:

«Մենք սպասում ենք բարերարների նվիրատվություններին: Հիմա բարերարներ գտնելը շատ դժվար է: Մինչ այս պահը սիրահայերին աջակցության ձեռք են մեկնալ ոչ միայն հայեր, այլև տարբեր ազգությունների ներկայացուցիչներ»,-ասաց կազմակերպության ներկայացուցիչը:

Հերթագրվածների առաջին խումբն առաջիկա օրերին Հայաստան կհասնի: Սիրիայում պատերազմը սկսելուց 220 մարդ կազմակերպության օգնությամբ է Երևան եկել:

Կազմակերպության անդամները շեշտում են, որ այս օգնությունը չի ենթադրում համայնքի պարպում, քանի որ տեղի չի ունենալու զանգվածային տեղափոխում։ Այս կոչը վերաբերում է միայն այն հալեպահայերին, ովքեր նյութական պատճառներով չեն կարողանում Լիբանանից տեղափոխվել Հայաստան:

Հալեպի հայաբնակ թաղամասերի ռմբակոծումը խստորեն դատապարտել էր ՀՀ ԱԳ նախարարությունը: Շրջափակման մեջ գտնվող քաղաքում գործող միությունները կոչով դիմել են   աշխարհին և միջազգային հանրությանը՝ խնդրելով օգնել հուղարկավորելու զոհերին: