Ձեր վստահելի աղբյուրը

Այսօր Ազգային ժողովի արտահերթ նիստում խորհրդարանը 68 կողմ, 21 դեմ և 18 ձեռնպահ ձայների հարաբերակցությամբը առաջին ընթերցման ռեժիմով ընդունեց Հարկային օրենսգրքի նախագիծը: Մինչև քվեարկության կազմակերպումը խմբակցություններն ու առանձին պատգամավորներ հայտնեցին իրենց դիրքորոշումը օրինագծի վերաբերյալ:

Պատգամավոր Էդմոն Մարուքյանը նկատեց, որ Հարկային օրենսգրքի նախագիծը Աժ-ին է ներկայացվել Իրավական ակտերի մասին օրենքի ԱԺ Կանոնակարգ օրենքի համապատասխան հոդվածների խախտումներով, քանի որ նախագծի հետ չկան ներկայացված տնտեսության վրա ազդեցության գնահատկանները:

«Նախագիծը ներկայացված է օրենքի խախտումներով, հետևաբար առաջարկում եմ հանել այն քվեարկությունից»,-դիմելով ԱԺ նիստը նախագահող Գալուստ Սահակյանին, հայտարարեց Մարուքյանը:

Սահակյանն ի պատասխան ասաց, որ որևէ օրենքի խախտում չկա ու շարունակեց վարել նիստը:

Այնուհետև ձայն խնդրեց կոալիցիոն կառավարության անդամ Դաշնակցություն կուսակցության խորհրդարանական խմբակցության ղեկավար Արմեն Ռուստամյանը և հայտարարեց, որ «լուրջ մտահոգություններ» ունեն այս տեսքով նախագիծը ընդունելու հետ կապված:

«Մենք պատրաստում ենք առաջարկությունների փաթեթ, որը կներկայացնենք օրինագծի հեղինակներին՝ ակնկալելով, որ դա լրջորեն կուսումնասիրվի: Հույս ունենք, որ այդ փաթեթի հետ կապված առաջարկությունները հեղինակները նկատի կունենան: Փաթեթի արձագանքից կորոշվի մեր հետագա քվեարկության ելքը», -հայտարարեց Ռուստամյանը՝ նշելով, որ իրենք կքվեարկեն ձեռնպահ:

Դիրքորոշումն հայտնելիս, ԱԺ պատգամավոր Հրանտ Բագրատյանն ասաց, որ սկզբունքային փոփոխություններ պետք է արվեն Հարկային օրենսգրքի նախագծում և այնպես չէ, որ հիմա առաջին ընթերցմամբ պետք է ընդունել, հետո նոր սկսել փոփոխություններ կատարել: «Առաջին ընթեցմամբ ընդունելու փաստը արդեն իսկ նշանակում է, որ օրենսգրքի նախագծի վրա այլևս լուրջ աշխատանք չի արվելու», -հայտարարեց Բագրատյանը:

Պատգամավոր Ստեփան Մարգարյանը հայտարարեց, որ «Համախմբում» կուսակցության անդամ հանդիսացող չորս պատգամավորները դեմ են քվեարկելու նախագծին, քանի որ օրինագիծը «էապես խանգարելու է բիզնեսի զարգացմանը ու ավելացնելու է ստվերայնությունը»:

Իր հերթին Հանրապետական խմբակցության անդամ Վադան Այվազյանը շեշտեց, որ իրենք պատրաստակամ են առաջին ընթերցմամբ ընդունումից հետո ընդունել առաջարկություններ ու քննարկել դրանք:

«Մենք ունենք կառավարության հետ հստակ պայմանավորվածություն՝ անկախ ընթերցումների ռեժիմից փոփոխություններ կատարել օրինագծում: Մենք այսօրվանից սկսում ենք քննարկումների շարք մինչև սեպտեմբեր ժամանակ ունենք, հիմա եկեք առաջին ընթեցմամբ ընդունենք, հետո վրան կկարողանանք աշխատել», -հավելեց Այվազյանը:

«Ժառանգություն» խմբակցության ներկայացուցիչ Զարուհի Փոստանջյանը ևս բացասական դիրքորոշում հայտնեց Հարկային օրենսգրքի նախագծի վերաբերյալ:

ՀԱԿ Խմբակցության ղեկավար Լևոն Զուրաբյանը տեղեկացրեց, որ դեմ են քվեարկելու օրինագծին, քանի որ այն այս տեսքով անընդունելի է իրենց համար՝ և բովանդակությամբ և քննարկման նման ձևով:

ԱԺ «Օրինաց երկիր» /Հայկական Վերածնունդ/ խմբակցության ղեկավար Հեղինե Բիշարյանը ևս հայտարարեց, որ իրենք դեմ են օրինագծին ու առաջարկեց քաղաքական կամք դրսևորել, հետ կանչել և քննարկումների արդյունքում ստացված նախագիծը նոր բերել խորհրդարան: «Պետք է կազմել այնպիսի նախագիծ, որ մեր հայրենակիցները չլքեն հայրենիքը», -նկատեց Բիշարյանը:

ԱԺ պատգամավոր Նիկոլ Փաշինյանը քաղաքական մեծամասնության համառությունից վերջնականապես եզրակացրել է. «Խորհրդարանական մեծամասնության մղումը, ըստ էության, հաստատում է այն վարկածը, որ միջազգային ֆինանսական կազմակերպությունների կողմից կա պարտադրանք: Ինչի՞ց է ուշանում, եթե հիմա չքվեարկենք: Ուշանում է վարկերից: Պետք է սա ընդունված լինի, որ վարկային համաձայնագրերը շատանան ու դրանց հետ կապված խնդիրներ չունենան միջազգային կազմակերպությունների հետ»:

Փաշինյանը նաև ընդգծեց, որ այս օրինագծի ընդունման արդյունքում սեղմած գազը, բենզինը, դիզելային վառելիքը, օղին, ծխախոտը կթանկանան:

«Բարգավաճ Հայաստան» խմբակցության ղեկավար Նաիրա Զոհրաբյանը հայտարարեց, որ իրենց խմբակցությունում որոշել են ձեռնպահ քվեարկել, ինքը չի մասնակցի քվեարկությանը, իսկ Հանրապետական խմբակցության ղեկավար վահրամ Բաղդասարյանը տեղեկացրեց, որ իրենք կողմ են քվեարկելու:

Նկատենք, որ Հանրապետական խմբակցության անդամ առանձին պատգամավորներ, որոնք գործարար աշխարհի հետ առնչություն ունեն, ևս դեմ էին ներկայացված օրինագծին: