Ձեր վստահելի աղբյուրը

«Իմ կյանքում մի թագուհի եմ ճանաչել՝ Օֆելյա Համբարձումյանին, մեր երգի թագուհուն: Երկրորդը չի լինելու»,- լրագրողներին ասաց ՀՀ ժողովրդական արտիստ Արսեն Գրիգորյանը (Մրո):
Նա մասնակցում էր Կոնդի Սուրբ Հովհաննես եկեղեցում ՀՀ ժողովրդական արտիստ Օֆելյա Համբարձումյանի հոգեհանգստի արարողությանը:

Ա. Գրիգորյանի բնորոշմամբ, երգչուհին բացառիկ երևույթ էր:

Օ. Համբարձումյանի հոգեհանգստին մասնակցում էին քաղաքական,  հասարակական, մշակութային գործիչներ, հասարակ քաղաքացիներ:

Վարչապետ Հովիկ Աբրահամյանն ասաց. «Օֆելյա Համբարձումյանը լեգենդ է, հայ ժողովրդական, աշուղական երգերի թագուհին: Կորցրեցինք մի մեծություն մեր արվեստում»:

Մշակույթի նախարար Հասմիկ Պողոսյանի խոսքով, Օֆելյա Համբարձումյանը աշուղական, ժողովրդական արվեստը բարձրացրեց  մի ուրիշ  մակարդակի և դրեց այն ճիշտ տեղում, որ պետք է զբաղեցներ:

«Սովորաբար, երբ որևէ մեկի վաստակն ուզում ենք գնահատել, ասում ենք՝ հատուկ դերակատարություն ուներ: Շատ անգամ միգուցե մեխանիկորեն ենք արտասանում, բայց Օֆելյա Համբարձումյանի դեպքում կարող ենք վստահորեն ասել: Նա ստեղծեց կատարողական արվեստի մի դպրոց, որից դեռ սերունդները կօգտվեն:  Մասնագետները դեռ անդրադառնալու են Օֆելյա Համբարձումյանի կատարողական արվեստի նրբություններին, երիտասարդ կատարողները դեռ օգտվելու են այն արվեստից, որը մեզ մատուցեց երգչուհին»,- աաց նախարարը:

Օֆելյա Համբարձումյանն, իրոք, սիրված ու գնահատված էր ժողովրդի կողմից, և ամենակարևորը՝ նաև երիտասարդների:

«Դեռ փոքրուց շատ եմ լսել իր կատարումները: Մայրս միշտ լսում էր իր երգերը՝ Սայաթ Նովայի, Ջիվանու, Շերամի ստեղծագործությունները: Ինձ ասում էր, որ չկա նրա նման երգչուհի: Ձայնն անկրկնելի է, անմիջապես կարելի է ասել, որ Օֆելյա Համաբարձումյանն է երգում»,- Panorama.am-ին ասաց երևանաբանակ 25-ամյա Նունեն:

60-ամյա Գայանե Մանուկյանը դժվարանում էր խոսել, արցունքները խեղդում էին նրան: Դուրս եկավ եկեղեցուց և մի քանի րոպե անց կրկին մտավ:

«Ուզում եմ անընդհատ նայել: Ինչ իմացել եմ, որ երգչուհին մահացել է, տեղս չեմ գտնում: Արդեն երկու օր է առավոտյան արթնանում ու նրա երգերն եմ լսում մինչև երեկո: Կարծես չեմ կշտանում:  Ներկա եմ եղել  Օֆելյա Համբարձումյանի համերգներին: Հմայված նայում էի, լսում, մեկ րոպե  ուշադրությունս չէր շեղվում: Չէի ուզում, որ համերգը վերջանար: Հիմա էլ չեմ ուզում հեռանալ, ուզում եմ նայել ու նայել»,- ասաց նա:

Հիշեցնենք, որ  Օֆելյա Համբարձումյանը մահացել է հունիսի 13-ին: Վերջին հրաժեշտը տեղի կունենա հունիսի 16-ին, ժամը 12:00-14:00-ն, Արամ Խաչատրյան համերգասրահում: Նրա աճյունը կամփոփվի Կոմիտասի անվան պանթեոնում: