Ձեր վստահելի աղբյուրը

«Քաղաքական ենթատեսքտ ունեցող հայտարարություն էր, սևեռվել էին զուտ Ֆաշիստական Գերմանիայի հետ համագործակցության վրա»,- լրագրողների հետ հանդիպման ժամանակ ասաց Հայաստանի Գրողների միության նախագահ Էդվարդ Միլիտոնյանը՝ խոսելով Երևանում Գարեգին Նժդեհի արձանի տեղադրման կապակցությամբ ՌԴ ԱԳՆ մամլո խոսնակի հայտարարության մասին:

Ըստ նրա, մինչև Երկրորդ համաշխարհային պատերազմը Գարեգին Նժդեհի կերպարն հայ ժողովրդի համար փառահեղ էր, հերոսացած լույսի մեջ էր: Է.Միլիոտոնյանի խոսքով, միգուցե շատ փաստեր  ռուսական կողմին  հայտնի չեն Նժդեհի գործունեությունից, որտեղ իր բացն ունի նաև հայկական կողմը:

«Մենք պետք է ճշգրիտ ներկայացնենք, ճիշտ գնահատենք մեր հերոսներին, մեր արժեքները: Ով ուզում է՝ թող ճանաչի, ով ուզում է՝ ոչ: Քաղաքական մանր քայլեր են, առաջիկայում կհարթվեն: Մենք սթափ պետք է նայենք: Սառը, հանգիստ ընդունել այդ ամենը, պատասխանել նորմալ, խորքային: Ես չեմ կարծում, որ սա հակահայկական ինչ-որ մի դրսևորում է: Ռուսական  որոշակի մամուլում, որոնք իսկապես Ադրբեջանի ազդեցության տակ են գտնվում, թուրքական ուժերի ազդեցության տակ են, հակահայկական այդ դրսևուրմները կան: Դա էլ ինչ -որ չափով, իբր Հայաստանում հակառուսականության ալիքի բարձրացման դեմ արվող երևի թե ինչ -որ մի բան է»,- նշեց նա:

Գրող, հրապարակախոս Մերուժան Տեր-Գուլանյանի խոսքով, Գարեգին Նժդեհը հայ ժողովրդի հերոսն է, իսկ հայ ժողովուրդն իրավունք ունի ցանկացած հերոսի արձան կանգնեցնել: Նա նշեց, որ այսօրվա ռուսական քաղաքականությունը զարմանալի մի բան է անում՝ Նժդեհին նույնացնում են Ուկրաինայի Բանդերայի հետ և հայտարարություններ անում:

«Եթե իմանային, ով էր Նժդեհը, նման խոսակցություն չէր  լինի: Մենք չենք կարողանում մեր հերոսներին համամարդկայնացնել»,- ասաց հրապարակախոսը: