Ձեր վստահելի աղբյուրը

«Գերմանիայի խորհրդարանի կողմից Հայոց ցեղասպանության ճանաչումը ինքնին շատ գնահատելի և հիշարժան քայլ է: Դա նաև կարևոր պաշտոնական հաղորդագրություն է՝ ուղղված այլ ժողովրդավար երկրներին, ինչպիսին են իմ երկու երկրները՝ Իսրայելը և ԱՄՆ-ն, որոնք վախկոտի պես խուսափել են ճանաչումից: Գերմանիայի ճանաչումն անշուշտ ուժեղ բարոյական ազդակ է այլ կառավարությունների համար»,-այսպիսի կարծիք Panorama.am-ի հետ զրույցում հայտնեց անվանի հրեա ցեղասպանագետ Իսրայել Չարնին՝ մեկնաբանելով Բունդեսթագի՝ հունիսի 2-ի որոշումը:

Դոկտոր Չարնին հատկապես կարևորեց այն, որ այս բանաձևով Գերմանիան ընդունում է իր սեփական դերը Հայոց ցեղասպանության մեջ, ինչը նրա կարծիքով է°լ ավելի ազդեցիկ է դարձնում այս որոշումը:

«Տարիներ շարունակ պատմաբանները հավաքել են մեծ քանակությամբ տեղեկություններ այն մասին, որ Հայոց ցեղասպանության մեջ Գերմանիան ունեցել է աջակցող ու արտոնող դեր և որոշ առումով նույնիսկ անմիջական մասնակցություն. այս ինքնակամ խոստովանությունը մեկընդմիշտ հաստատում է Գերմանիայի հանցակցության մասին փաստերի իսկությունը»,– նշեց Չարնին:

Հիշեցնելով, որ միջազգային գիտական համայնքը վաղուց արդեն կոնսենսուս ունի 1915թ.-ի ցեղասպանության փաստի շուրջ՝ Իսրայել Չարնին ավելացրեց. «Ինչ վերաբերում է թուրքերի կողմից պարբերաբար կրկնվող զավեշտալի պնդումներին, թե գիտնականներն ու պատմաբանները պետք է [այս հարցի շուրջ] գան ընդհանուր եզրակացության, ապա թող նրանք իմանան, որ այդ եզրակացությունն արդեն անվիճելիորեն տրվել է»:

Դոկտոր Չարնին, ով երկար տարիներ պայքարել է Իսրայելի կողմից Հայոց ցեղասպանության ճանաչման համար, կարծում է, որ հանուն ճանաչման արժե որոշակի գին վճարել՝ ի դեմս Թուրքիայի հետ հարաբերությունների վատթարացման:

Նա համոզված է սակայն, որ Բունդեսթագի այս որոշումը չի վատթարացնի Գերմանիայի և Թուրքիայի միջև հարաբերությունները:

«Կարճ ժամանակ անց Թուրքիան կպատվիրի գերմանական գարեջրի հաջորդ խմբաքանակը», - հեգնանքով նկատեց նա:  

Քննադատելով Թուրքիայի ներկայիս ռեժիմի վարած քաղաքականությունը փոքրամասնությունների հանդեպ՝ հրեա պատմաբանն ասաց. «Այս օրերին բռնապետ Էրդողանը գնալով է°լ ավելի է կտրվում աշխարհից, նա խճճվել է իր սեփական սարդոստայնում, որով ճնշում է բազմաթիվ թուրք գրողների, ոստիկանների և այլոց՝ էլ չխոսենք իր վտանգավոր էթնոկենտրոնության մասին ազգությամբ ոչ թուրքերի հանդեպ, ինչպիսին են քրդերը»:  

Հարցազրույցը՝  Նվարդ Չալիկյանի