Ձեր վստահելի աղբյուրը

Հայաստանում գործող բիզնես ասոցիացիաներն իրենց մտահոգությունն ու անհամաձայնությունն են հայտնում կառավարության կողմից մշակված և Ազգային ժողովում առաջին ընթերցմամբ ընդունված Հարկային օրենսգրքի վերաբերյալ:

Խնդրի վերաբերյալ այսօր քննարկում էին կազմակերպել Հայաստանում Ամերիկայի առևտրի պալատի, Հայաստանի բանկերի միության, Ինֆորմացիոն տեխնոլոգիաների ձեռնարկությունների միության,  Տեղեկատվական և հաղորդակցության տեխնոլոգիաների գործատուների միության, «Հարկ վճարողների պաշտպանություն» ՀԿ-ի, Եվրոպական բիզնես ասոցիացիայի և Հայաստանի շինարարների միության ներկայացուցիչները:

Նրանք այլ բիզնես ասոցիացիաների հետ համատեղ հայտարարության տեքստ են պատրաստել, որում մանրամասն ներկայացնում են, թե ինչու են դեմ Հարկային օրենսգրքին:

Հայաստանում Ամերիկայի Առևտրի Պալատի նախագահ Տիգրան Ջրբաշյանը նշեց, որ իրենք կոչ են անում պատկան մարմիններին նախաձեռնել հանրային լսումներ շահագրգիռ կողմերի մասնակցությամբ, որպեսզի նախագիծը վերանայեն և իր նպատակին համահունչ դարձնեն:

Ըստ նրա՝ ուսումնասիրելով Հարկային օրենսգքրի նախագիծը՝ հայտնում են, որ այնտեղ տեղ են գտել այնպիսի դրույթներ, որոնք ոչ միայն չեն բխում նախօրոք հաստատված Հարկային օրենսգրքի հայեցակարգից և Հարկային խորհրդում նախապես քննարկված ու համաձայնեցված տարբերակից, այլև լուրջ հակասություններ ունեն դրա հիմնական հայեցակարգային գաղափարի հետ և կարող են խիստ բացասական ազդեցություն ունենալ ՀՀ տնտեսության վրա: «Ավելին, օրենսգրքի կարգավորման ազդեցության գնահատումը չի իրականացվել պատշաճ մակարդակով, քանի որ Հայաստանի տնտեսության համար դեռևս մշակված չէ Հաշվարկելի ընդհանուր հավասարակշռության մոդելը, առանց որի կարգավորման ազդեցության գնահատման ամբողջականության մասին խոսելն ավելորդ է»,- նշեց նա:

Տիգրան Ջրբաշյանի խոսքերով՝ նախկինում Կառավարության հետ իրենք քննարկել են Հարկային նոր օրենսգիրքը՝ սկսելով հայեցակարգից, քանի որ, ըստ նրա,  օրենսգրքից առաջ պետք էր հայեցակարգային մոտեցում ունենալ, հետո միայն սկսել հոդվածային քննարկումները:

Հայեցակարգում առաջարկել են ավելացնել հինգ կետեր, որոնք պետք է ուղղված լինեն օտարերկրյա ուղղակի ներդրումների ներգավմանը, ազգային տնտեսության և վերազինման արդիականացմանը, արտահանման խթանմանը, ինչպես նաև մրցունակ պետք է լինի հարկային համակարգը, և ապահովի երկարատև ու կայուն տնտեսական աճի հիմք: Դրանք, ըստ նրա, ներառվեցին օրենսգրքի նախագծում, բիզնես ասոցիացիաների կողմից ևս  400 առաջարկներ  ներառվեցին: Այսպսիով, հայեցակարգային քննարկումներն արդյունավետ են ընթացել: Ավելին, Տիգրան Ջրբաշյանի բնութագրմամբ, մինչ այժմ նման կառուցողական քնննարկում Հայաստանի պատմության մեջ չէր եղել: Սակայն, իրադարձություններն այլ ընթացք են ստացել դրա մշակման փուլում և ներկայացվեց օրենսգրքի կիսաավարտ տարբերակը, որը, նրա խոսքերով, հակասում էր հայեցակարգային այն կետերին, որոնք բարձրացվել էին բիզնես ներկայացուցիչների կողմից:

«Արդյունքում, ծնվեց մի փաստաթուղթ, որը հակասում էր հայեցակարգային այն կետերին, որոնք մենք բարձրացրել էինք: Դրանից հետո բիզնես ասոցիացիաները համատեղ նամակ հղեցին վարչապետին՝ առաջարկելով այս նախագիծը չներկայացնել Ազգային ժողով և մտնել նոր քննարկումների փուլ:  Դրանից հետո եղավ 2,5 ժամ տևողությամբ  քննարկում վարչապետի մասնակցությամբ, եղավ հանձնարարություն՝ ստեղծել աշխատանքային խումբ՝ նախագծի շուրջ քննարկում անելու համար, որից հետո, ցավոք սրտի, Հարկային օրենսգիրքը արտահերթ ֆորմատով ներկայացվեց Ազգային ժողով և առաջին ընթերացմամբ ընդունվեց այն տարբերակը, որը կա այսօր»,- նշեց  Տիգրան Ջրբաշյանը:

Ըստ նրա՝  Հարկային նոր օրենսգրքում կան մի շարք  լուրջ խնդիրներ, որոնք հանրային լսումների միջոցով պետք է լուծվեն:

Տիգրան Ջրբաշյանը վստահ է, որ ՀՀ կառավարությունը և Ազգային ժողովը, անգամ ԱԺ-ում կողմ քվեարկած պատգամավորների մեծամասնությունն ունի լուրջ մտահոգություններ այս նախագծի վերաբերյալ: Ուստի հույս ունի, որ առաջինից երկրորդ ընթերցման ժամանակ լուրջ փոփոխություններ կկատարվեն նախագծում:

«Կարծում եմ, որ մեր այսօրվա հայտարարությունը կբերի նրան, որ այդ փոփոխություններին վերաբերվեն շատ լուրջ , քանի որ մենք ներկայացնում ենք այն վտանգները, որոնք կան այդ նախագծում: Մեծ հույսեր ունեմ, որ արդյունքում կընդունվի այնպիսի նախագիծ, որն ընդունելի կլին հասարակության բոլոր կողմերի համար և մենք կունենանք  որակապես փոփոխոված Հարկային օրենսգիրք, որը կներկայացվի հանրությանը սեպտեմբերին: Հակառակ դեպքում, եթե սկզբունքային հարցերին պատասխան չտրվի, առաջ չենք կարողանա շարժվել»,- ընդգծեց Տիգրան Ջրբաշյանը: