Ձեր վստահելի աղբյուրը

Ադրբեջանի պատանդների և անհայտ կորածների հարցերով զբաղվող պետական հանձնաժողովի ղեկավար Իսմայիլ Ախունդովը հայտարարել է, որ Ադրբեջանը ԿԽՄԿ-ի միջնորդությամբ կարող է «կարճ ժամանակահատվածում սկսել» Լեռնային Ղարաբաղում ազատազրկման դատապարտված` Ադրբեջանի քաղաքացիներ Դիլհամ Ասկերովի և Շահբազ Գուլիևի, ինչպես նաև Ադրբեջանում ազատազրկման դատապարտված` ՀՀ քաղաքացի Արսեն Բաղդասարյանի ազատ արձակման հարցի քննարկումը:

ԼՂՀ ռազմագերիների, պատանդների և անհայտ կորածների հարցերով զբաղվող պետական հանձնաժողովի նախագահ Վիկտոր Քոչարյանը Panorama.am-ի հետ զրույցում ասաց, որ հայտարարությանը ծանոթ չէ, իսկ իր ղեկավարած հանձնաժողովում նման հարց չի քննարկվել:
Եթե ԿԽՄԿ-ն այս առաջարկը փոխանցի արցախյան կողմին, ի՞նչ որոշման է հակված հայկական կողմը: Հարցին ի պատասխան Քոչարյանն ասաց.

«Չեմ կարող ասել, ոչ մի բանի էլ հակված չենք: Գուլիևն ու Ասկերովը դիվերսանտներ են, պատիժը կրում են մեր օրենքներին համապատասխան: Նրանք ոչ գերի են, ոչ պատանդ»:

Ինչ վերաբերում է Արսեն Բաղդասարայանի վիճակին մասին տեղեկություններին, Վ. Քոչարյանն ասաց, որ Կարմիր Խաչի միջազգային կազմակերպության միջնորդությամբ նա նամակագրական կապ է պահում ընտանիքի անդամների հետ:

Հիշեցնենք, որ Դիլհամ Ասկերովը դատապարտվել է ցմահ ազատազրկման՝ մեղավոր ճանաչվելով ԼՂՀ Քրեական օրենսգրքի 316-րդ հոդվածով՝ լրտեսության, 350-րդ հոդվածի 2-րդ մասով՝ առանց պատշաճ թույլտվության ԼՂՀ պահպանվող պետական սահմանը կազմակերպված խմբի կողմից հատելու, 245-րդ հոդվածի 3-րդ մասով՝ կազմակերպված խմբի կողմից ապօրինի կերպով հրազեն և ռազմամթերք կրելու, 129-րդ հոդվածի 3-րդ մասի 1-ին կետով՝ մարդուն բացահայտ առևանգելու՝ կյանքի համար վտանգավոր բռնություն գործադրելով, 103-րդ հոդվածի 2-րդ մասի 3-րդ, 7-րդ և 14-րդ կետերով՝ սպանությունը՝ զուգորդված մարդուն առևանգելով, կազմակերպված խմբի կողմից, ազգային ատելության շարժառիթով։

Հանցախմբի մյուս անդամ Շահբազ Գուլիևը դատապարտվել է 22 տարվա ազատազրկման՝ մեղավոր ճանաչվելով ԼՂՀ Քրեական օրենսգրքի 316-րդ հոդվածով՝ լրտեսության, 350-րդ հոդվածի 2-րդ մասով՝ առանց պատշաճ թույլտվության ԼՂՀ պահպանվող պետական սահմանը կազմակերպված խմբի կողմից հատելու, 245-րդ հոդվածի 3-րդ մասով՝ կազմակերպված խմբի կողմից ապօրինի կերպով հրազեն և ռազմամթերք կրելու, 129-րդ հոդվածի 3-րդ մասի 1-ին կետով՝ մարդուն բացահայտ առևանգելու՝ կյանքի համար վտանգավոր բռնություն կիրառելով՝ զենքի գործադրմամբ, ինչպես նաև ուրիշին պատկանող գույքի գաղտնի հափշտակման մեջ։

Ինչ վերաբերում է Արսեն Բաղդասարյանին, ապա նա գերեվարվել է 2014 թվականի դեկտեմբերի 26-ին ղարաբաղա-ադրբեջանական շփման գծի Ակնայի (նախկինում՝ Աղդամ) հատվածում: Գյանջա քաղաքի ծանր հանցագործությունների գործերով դատարանը նրան դատապարտել է 15 տարվա ազատազրկման: Դատարանը նրան «մեղավոր է» ճանաչել Ադրբեջանի քրեական օրենսգրքի 218.2 (հանցավոր խմբավորման անդամ լինելը), 120.2.2 (մի խումբ մարդկանց կողմից իրականացված դիտավորյալ սպանության փորձ), 120.2.7 (երկու կամ ավելի մարդկանց դիտավորյալ սպանության փորձ), 120.2.12 (ազգային, կրոնական կամ ռասայական ատելության հողի վրա դիտավորյալ սպանության փորձ), 282.2 (Ադրբեջանի տնտեսական ապահովությունը սասանելու նպատակով հաստատությունների, շինությունների, հաղորդակցման միջոցների, կապի միջոցների, բնակչության կենսապահովման օբյեկտների պայթյուն կամ հրդեհ կազմակերպելը) հոդվածներով: