Ձեր վստահելի աղբյուրը

ԱՄՆ կոնգրեսականները, ովքեր Ադրբեջանի կառավարության կողմից գաղտնի ֆինանսավորված ուղևորություն էին կատարել Բաքու, հետ են վերադարձել Բաքվում որպես նվերներ ստացած նեֆրիտե ականջօղերը, թեյի սպասքը, մետաքսե շարֆերը, գորգերը և բազում այլ նվերներ: Այս մասին գրում է «The Hill» պարբերականը: 

Պարբերականը նկատում է, որ նվերների հետ հանձնումը General Services Administration (GSA)-ին տեղի է ունեցել այն  բանից հետո, երբ պարզվել էր, որ Ադրբեջանի իշխանությունների կողմից թանկարժեք նվերներ վերցնելը հակասում է ԱՄՆ օրենսդրությանը:

«Ընդհանուր առմամբ 9 կոնգրեսականներ և նրանց ուղեկցող անձնակազմի 32 անդամներ Ադրբեջանի կառավարությունից ստացել էին հազարավոր դոլարներ արժեցող թանկ նվերներ: Կոնգրեսականներից ոմանք նաև հետո մեկնել էին Թուրքիա և այնտեղ նույնպես թանկ նվերներ ստացել»,- գրում է պարբերականը՝ հղում անելով Կոնգրեսի էթիկայի հարցերով հանձնաժողովի զեկույցին:

Մանրամասնելով՝ պարբերականը գրում է, որ ըստ դիտորդական խմբի բացահայտումների, Տեխասում գտնվող հասարակական կազմակերպությունները կեղծ հայտարարություններ են լրացրել՝ նշելով, որ իրենք են վճարում ուղևորության համար, երբ իրականում համաժողովը և ուղևորությունները ֆինանսավորել է Ադրբեջանի պետական նավթային ընկերություն SOCAR-ը՝ 750 հազար դոլար փոխանցելով ոչ կառավարական կազմակերպությունների հաշիվներին:

«Հետ վերադարձրած նվերների թվում են նաև թանկաժեք գրիչներ, կաշվե օրագրեր, ինչպես նաև Ադրբեջանի նախագահի մասին պատմող խտասկավառակներ, մեծ և փոքր չափերի գորգեր»,- գրում է պարբերականը:

Ըստ պարբերականի, նվերները ստացած անձինք կամ դրանք պետք է անձամբ հետ վերադարձնեն նվերը տվող անձին կամ կառույցին, կամ էլ հետ հանձնեն Կոնգրեսի գործակատարին, ով այն այնուհետև տրամադրում է General Services Administration (GSA)-ին՝ պահպանության կամ վաճառքի նպատակով: