Ձեր վստահելի աղբյուրը

«Ֆորբս» հանդեսը լայնածավալ անդրադարձ է կատարել Թուրքիայի նախագահ Ռեջեփ Թայիփ Էրդողանի և երկրում մեծ հեղինակություն վայելով աստվածաբան Ֆեթուլահ Գյուլենի հակամարտությանը՝ նշելով, որ դրա արդյունքում լրջագույն հարված հասցվեց պաշտոնական Անկարայի կողմից բանեցվող «փափուկ ուժի» քաղաքականությանը:

Աղբյուրը նշում է, որ վերջերս միջազգային խորհրդատվական «պորտլանդ» ընկերությունը հրապարակել է աշխարհում ամենաազդեցիկ «The Soft Power 30» երկրների ցանկը, որպես վերոնշյալ պետությունների ազդեցիկության չափանիշ ընտրվել է նրանց կողմից «փափուկ ուժի» կիրառման ունակությունը: Հատկանշական է, որ սույն քաղաքականությանը հսկայական ուշադրություն դարձնող Թուրքիան չի ընդգրկվել 30 ազդեցիկ երկրների շարքում՝ զբաղեցնելով միայն 32-րդ տեղը:

Աղբյուրը նշում է, որ փախստականների շուրջ ստեղծված իրավիճակը, քուրդ զինյալների դեմ պատերազմը, Ռուսաստանի հետ հակամարտությունը, ինչպես նաև ԵՄ-ի հետ լարված հարաբերությունները չէին կարող իրենց ազդեցություն չունենալ սանդղակում Թուրքիայի զբաղեցրած տեղի վրա: Ըստ հանդեսի, Անկարայի դիրքերի նման թուլացումը, մեծամասամբ կախված է իշխող քաղաքական ուժի և «Գյուլենականների» (Իմամ Ֆեթուլահ Գյուլենի կողմնակիցների) միջև կապերի խզումից:

Թուրքիայում ամենաազդեցիկ մարդկանցից մեկը 1990-ականների վերջից չի եղել Թուրքիայում և մշտապես բնակվում է ԱՄՆ-ում:

Մինչև վերջին ժամանակներս գյուլենականները հիացած էին նախագահ Էրդողանով՝ նշելով, որ նա իրենց առաջնորդն ու հպարտությունն է: Սակայն 2003թ.-ից նրանց շուրթերից Էրդողանի վերաբերյալ պախարակումից բացի այլ բան չի հնչել: Գյուլենականները Էրդողանին անվանում են «կեղծ սուլթան», «բռնապետ», «դիկտատոր» և այլն:

Գյուլենի և Էրդողանի միջև հարաբերությունների սրման պատճառը դարձավ 2013թ.-ի դեկտեմբերի 17-ին Թուրքիայում անցկացված հակակոռուպցիոն օպերացիան: Բացի դրանից, Էրդողանի շրջապատը հայտարարում էր, որ գյուլենականները ստեղծել են պետություն պետության մեջ և իրենց մարդկանց են նշանակել նախարարություններում և անվտանգության մարմիններում, ինչպես նաև բռնազավթել են ԶԼՄ-ները:

Արդյունքում լուրջ հարված հասցվեց Թուրքիայում «փափուկ ուժի» քաղաքականությանը, ինչի հետևանքով գյուլենականների ազդեցության տակ գտնվող և դրսում լայն կապեր ունեցող հասարակական և քաղաքական գործիչները այժմ խոսում են ոչ թե Էրդողանի քաղաքական հանճարի, այլ մարդու իրավունքների խախտումների, ինչպես նաև ԶԼՄ-ների ու ընդդիմության վրա ճնշումների մասին,-գրում է «Ֆորբսը»: