Ձեր վստահելի աղբյուրը

Հարկային օրենսգրքի նախնական տարբերակում կային դրույթներ, որոնք գոհացնում էին բիզնեսի ոլորտի ներկայացուցիչներին, սակայն փոփոխություններից հետո լուրջ խնդիրներ ի հայտ եկան: Այս մասին այսօր լրագրողների հետ հանդիպման ժամանակ ասաց «Հայաստանի բանկերի միության» նախագահ Սամվել Ճզմաչյանը:

«Բյուջեն հարկավոր է լցնել տնտեսության ճյուղերի զարգացման միջոցով, ոչ թե՝ թվաբանական գործողություններով »,- նշեց նա:

Սամվել Ճզմաչյանի խոսքերով՝ եկամտային հարկի բարձրացման դեպքում ոլորտում մեկ աշխատողի թվով թեև մեծ բեռ չի լինելու, սակայն  դա կունենա խիստ բացասական հոգեբանական ազդեցություն, իսկ դա այսօր պետք չէ մեր երկրին:

«Դա միանշանակ կբերի վերադարձ դեպի ստվերին: Ինչպես 1990-ական թվականների սկզբին էին մարդկանց ծրարներով աշխատավարձ բաժանում, ապա հնարավոր է, որ այդ վիճակն այսօր կրկնվի: Սակայն դա առաջին հերթին ձեռնտու չէ բանկերի համար, որոնք արդեն 15 տարի է աշխատում են թափանցիկ։ Հարկային նոր օրենսգրքի ընդունումից հետո բանկերն այլևս չեն կարող աշխատել թափանցիկ: Դա վերաբերում է թե բանկերին, թե տեղեկատվական ոլորտին:  Մենք ոչ թե պետք է դրդենք գնալ դեպի ստվեր, այլ ստվերից պետք է դուրս գանք: Ստվերը մեր տնտեսությունը քանդում է»,- ասաց «Հայաստանի բանկերի միության» նախագահը:

Սամվել  Ճզմաչյանը նշեց, որ Հայաստանում պետք է իրականացնել ներդրումային միջավայրի բարելավում, ոչ թե հակառակը: Մինչդեռ օրենսգիրքն այս տեսքով ընդունելու դեպքում, ըստ նրա,  օտարերկրյա ներդրումները կշարունակեն նվազել:

Նա նաև նշեց, որ վերջին 10 տարիների ընթացքում  որևէ նոր բանկ չի բացվել Հայաստանում. «Ինչո՞ւ. Քանի որ գրավչությունը բավականին նվազել է: Որևէ արտասահմանցի նպատակահարմար չի գտնում, որ գա Հայաստան և բանկ բացի»: