Ձեր վստահելի աղբյուրը

Ադրբեջանը փորձում է այս և մի շարք այլ միջոցներով նախագահների հնարավոր հանդիպումից առաջ և հայկական կողմի, և միջնորդների նկատմամբ ճնշումներ գործադրել: Այդ մասին Panorama.am-ի թղթակցի հետ զրույցում ասաց քաղաքագետ Տիգրան Աբրահամյանը՝ մեկնաբանելով շփման գծում Ադրբեջանի կողմից օպերատիվ-մարտավարական զորավարժությունների անցկացման փաստը:

Նկատենք, որ Ադրբեջանի ՊՆ-ն պաշտոնապես հայտարարել է, որ զորավարժություններն անցկացվում են սահմանամերձ շրջաններում, նաև Նախիջևանի ու Կասպից ծովի հատվածներում:

«Ապրիլյան իրադարձություններից երկու ամիս հետո, նախագահների հնարավոր հանդիպումից անմիջապես առաջ, նման մասշտաբի զորավարժությունների անցկացումն ավելի շատ շանտաժ է հիշեցնում», -հավելեց Աբրահամյանը:

Նույն աղբյուրը նաև հայտարարել էր, որ այս զորավարժության առանձնահատկությունն այն է, որ լայնորեն կիրառվելու են նոր տեխնոլոգիական միջոցներ՝ հաշվի առնելով պայմանական հակառակորդի ուժեղ պաշտպանական համակարգերը:

Հարցին, թե ի՞նչ խնդիր է սրանով փորձում լուծել այդ երկիրը քաղաքագետը ի պատասխան, ընդգծեց, որ նման զորավարժություններ Ադրբեջանի պաշտպանական գերատեսչությունը նախապես ծրագրած չի եղել ու հավելեց.

«Միանգամից նշեմ, որ այսպիսի կարևոր ժամանակաշրջանում նման զորավարժությունների անցկացում հստակ ի ցույց է դնում Ադրբեջանի իրական ցանկությունը՝ ԼՂ հիմնախնդիրը լուծելու ռազմական ճանապարհով: Պետք է հաշվի առնել այն հանգամանքը, որ այս ժամակահատվածում Ադրբեջանի պաշտպանական գերատեսչության մարտական պատրաստության պլանում զորավարժությունները պլանավորված չէր, այսինքն՝ ըստ էության, Ադրբեջանը, այսպես ասած, արտահերթ զորավարժություններ է պլանավորել՝ շփման գծից ընդամենը 15-20 կմ հեռավորության վրա»:

Այդուհանդերձ, ըստ մեր զրուցակցի, նման քանակության ռազմական տեխնիկայի կենտրոնացումը ցանկալի չէ:

«Ապրիլյան իրադարձություններից շատ ժամանակ չի անցել ու հաշվի առնելով Ադրբեջանի՝ շատ անգամ անկանխատեսելի վարքագիծն ու միջազգային գործընկերների առջև ստանձնած պարտավորությունների անտեսման հաճախակի դեպքերը, այնուամենայնիվ, նման քանակության ռազմական տեխնիկայի ու մարդկային ռեսուրսների կենտրոնացումը, եթե չասենք վտանգավոր է, ապա հաստատ ցանկալի չէ»:

Հարցին, թե ի՞նչ ակնկալիքներ ունի հունիսի 20-ին Սանկտ-Պետերբուրգում կայանալիք երկու երկրների նախագահների հանդիպումից, Աբրահամյանը պատասխանեց.

«Իմ տպավորությամբ՝ Ադրբեջանը գործընթացը գիտակցված տանում է վերջնական տապալման: Ամեն դեպքում այդ մասին են վկայում Ադրբեջանից հնչող հայտարարություններն ու Վիեննայում նախագահների միջև ձեռք բերված պայմանավորվածությունների վերաբերյալ Ադրբեջանի լռությունը»:

Անդրադառնալով ԼՂՀ նախագահ Բակո Սահակյանի  վերջին արտերկրյա այցի վերաբերյալ ադրբեջանական կողմի արձագանքներին, քաղաքագետը նկատեց, որ այդ երկրում Արցախի նախագահի արտերկրյա այցերը «ծանր են տանում» ու հավելեց. «ԼՂՀ նախագահի արտերկրյա այցերն ու քաղաքական տարբեր շրջանակների հետ շփումներն նպատակ ունեն զարգացնել, ուժեղացնել Արցախն ու նպաստել ԼՂՀ ճանաչման գործընթացին:

Այս փաստն անշուշտ չի կարող անտարբեր թողնել ադրբեջանական իշխանություններին և որքան Արցախի անկախության գործընթացն ակտիվանա, որքան Արցախն առավել հետաքրքիր դառնա աշխարհի համար, այնքան Ադրբեջանից հնչող նյարդային հայտարարությունները հաճախակի բնույթ կկրեն»: