Ձեր վստահելի աղբյուրը

Համայնքների խոշորացման ծրագրի շրջանակներում սպասվում է նաև 3-րդ փուլ, որն առնչվելու է Արագածոտնի մարզին: Ազգային ժողովի արտահերթ նիստում, հիշեցնենք, օրերս ընդունվեց Արարատի, Շիրակի, Սյունիքի, Վայոց Ձորի և Տավուշի մարզերին առնչվող օրենսդրական փոփոխությունը:

Այժմ ծրագրվում է Արագածոտնի մարզում ստեղծել երկու խոշորացված կենտրոն, որոնցից մեկի մեջ ընդգրկվելու են եզդիական 10 համայքններ և 1 հայկական գյուղ՝ Մելիքգյուղը:

Ալագյազ գյուղի շուրջ, ըստ ծրագրի, կմիավորվեն եզդիներով ու քրդերով բնակեցված Ջամշլու, Սիփան, Ավշեն, Ռիաթազա, Ճարճակիս, Միջնատուն, Միրաք, Շենկանի և հայերով բնակեցված Մելիքգյուղը:

Մելիքգյուղի գյուղապետ Հակոբ Մկրտչյանը Panorama.am-ին տեղեկացրեց, որ իրենց գյուղը, որն ունի 1400 բնակչություն, ընդգրկել էին խոշորացման ծրագրում, սակայն կառավարությունից նրանց փոխանցել են, որ առայժմ Մելիքգյուղը խոշորացման ծրագրում չի ընդգրկվի:

«Բողոքել եմ, դիմել եմ կառավարություն, ասեցին, որ Մելիքգյուղը դեռ կմնա չեզոք: Մեր համայնքը պետությունից ոչ մի խնդրելու բան էլ չունի, մենք կարանք մեր պայմանները ստեղծենք: Հանքավայրեր ունենք, եթե շահագործվի, օգուտներ կստանանք, ֆինանս կունենանք», -ասաց Մկրտչյանը:

Ալագյազի գյուղապետ Ազիզ Մհոյանը մեզ հետ զրույցում նկատեց, որ համայնքների խոշորացումը համայնքների համաչափ զարգացման ծրագիր է ու «եթե ճիշտ օգտագործվի, լավ կլինի»:

Ինչ վերաբերում է ազգությամբ եզդիներով բնակեցված տարածքների բաժանմանը, Մհոյանն ասաց, որ իր կարծիքով դա վիրավորական է:

«Ճիշտն ասած, մի քիչ վիրավորական ա, ինչի՞ են մեզ անջատում: Ես առանձին որպես եզդիական միավոր չեմ ընդունում, բոլորին էլ ասել եմ էդ մասին, բոլոր էդ 11 համայնքների ղեկավարներն էլ դեմ են, որ եզդիականը առանձին լինի: Ի՞նչ տարբերություն եզդիակա՞ն է, թե՞ հայկական», -ասաց Մհոյանը:

Իսկ հայկական գյուղերի հետ միավորվելուն իրենք դեմ չեն. «Մենք խնդիր չենք տեսնում, որ խնդիր տեսնեինք, ցավդ տանեմ, հիմա ստեղ գործ չէինք ունենա, կթողնեինք, կգնայինք: Սա մեր սրբավայրն ա, մենք մեր եղբայրների հետ հավասար ապրում ենք: Չենք էլ զգում, որ օտար ազգ ենք»: