Ձեր վստահելի աղբյուրը

«Սիրիահայերը կարողանում են Հայաստանում  հանգիստ խղճով  ապրել և ստեղծագործել: Եթե հոգեպես տառապեին, վատ պայմաններում լինեին, չէին կարող այսօր նման աշխատանքներ ներկայացրել: Նրանք վստահ կանգնած են հայրենի հողի վրա, հաստատվել են այստեղ»,-Փախստականների համաշխարհային օրվան նվիրված «Ճգնաժամի հինգ տարին. նոր կյանքի մաքառման հինգ տարին»  խորագրով միջոցառմանը լրագրողներին ասաց սփյուռքի նախարար Հրանուշ Հակոբյանը:

Նշենք, որ միջոցառման շրջանակում կազմակերպվել է նաև ցուցահանդես-վաճառք, որտեղ ներկայացված են  սիրիահայերը աշխատանքները: Միջոցառումը կազմակերպել է ՄԱԿ ՓԳՀ-ն Օքսֆամ կազմակերպության հետ համատեղ՝ ՄԱԿ ՓԳՀ-ի «Մենք կանգնած ենք Փախստականների կողքին» և Օքսֆամի «Սիրիայի կողքին» քարոզարշավների շրջանակներում:

Նախարարի խոսքով, նման միջոցառումների միջոցով փորձում են նախ հասարակությանը  ներկայացնել սիրիահայերի աշխատանքները,  կապ հաստատել հենց Հայաստան տեղափոխված սիրիահայերի միջև. «Փոքրիկ բիզնես ցանց է ստեղծվում՝ մեկը մյուսին օգտակար, մեկը մյուսին հզորացնելու, ուժեղացնելու համար»:

«Բնական է, որ այս ամենին հասնելու համար անցել են որոշակի բարդ ճանապարհ, մինչև հարմարվել են մեր պայմաններին: Կարող ենք ասել, որ սիրիահայերի ինտեգրման գործընթացը մեր երկրում գրեթե ավարտված է՝ կրթության, սոցիալական, առողջապահության, մշակութային ոլորտներում: Երևի միակ խնդիրը, որ դեռ բոլորն ունեն, իրենց սրտին  և հոգուն  հարազատ աշխատանքն է: Եթե այս հարցն էլ կարգավորվի, նշանակում է, որ կարողացել են լուծել գլխավոր խնդիրը՝ ունեն աշխատանք, ունեն ապահով հայրենիք»,- ասաց նախարար Հակոբյանը:

Օքսֆամ մասնաճյուղի տնօրեն Մարգարիտա Հակոբյանի խոսքով, իրենք ՄԱԿ ՓԳՀ-ի հետ համատեղ կարողացել են նպաստել սիրիահայերի ինտեգրմանը, անցած տարվանից մասնակի փոխհատուցում են 300 սիրիահայ ընտանիքի տան վարձը՝ ամիսը 60-80 հազար դրամ:

«Այս ծրագրից հիմնականում օգտվում են ամենախոցելի և անապահով ընտանիքները»,- ասաց նա՝  հավելելով, որ ծրագիրը կլինի շարունակական:

Սիրիահայերը նույնպես կարևորում են նման ցուցահանդեսները՝ նշելով, որ այսպես կարողանում են ավելի լայն շրջանակների ներկայացրել իրենց ապրանքը, նաև գտնել գործընկերներ:

Նշենք, որ ցուցահանդես- վաճառքը գործում է Մարիոթ հյուրանոցի Արարատ սրահում մինչև ժամը 18:00-ն: Ներկայացված ձեռագործ տարբեր աշխատանքներ, արծաթե իրեր, քաղցրավենիք և այլն: