Ձեր վստահելի աղբյուրը

Տարածաշրջանային հարցերով փորձագետ- վերլուծաբան Սարգիս Հացպանյանն այսօր լրագրողների հետ հանդիպման ժամանակ ցուցադրեց Պոլսո Հայոց պատրիարքի փոխանորդ Արամ արքեպիսկոպոս Աթեշյանի՝ Էջմիածնում գտնվող տան լուսանկարները, դրա  առք ու վաճառքի պայմանագիրը:

«Սա ընդամենը նրա ունեցած մեկ տան փաստն է, Աբովյան քաղաքում ավելի մեծ կալվածքներ ունի: Մոսկվայում բիզնեսներ ունի, Ստամբուլի ամենաթանկանոց թաղամասում անշարժ գույք ունի: Հայ հոգևորականը պետք է հոգևոր ծառայություն մատուցի իր ժողովրդին, ոչ ոք չի հարցնում որտեղից այս ամբողջը»,- ասաց Հացպանյանը:

Նրա կարծիքով, եթե Աթեշյանն ինքնակամ չհրաժարվի իր «բռնազավթած» աթոռից և թույլ չտա՝  Կոստանդնուպոլսում տեղի ունենան պատրիարքի ընտրություններ, ուրեմն «մենք իրոք շատ  մեծ պրոբլեմի առաջ ենք կանգնելու, քանի որ Թուրքիան իր խաղն առաջ է տանելու նրա միջոցով»:

«Թույլ չենք տալու Արամ Աթեշյանին Հայաստան մտնել» անվանմամբ հանրային նախաձեռնության անդամների Գոհար Արշակյանն ասաց, որ նախաձեռնության կողմնակիցները շատ են:

«Աթեշյանն իր այդ քայլով ոչ միայն պղծեց 1.5 մլն զոհերի, մարտիրոսվածների հիշատակը, այլև մեզ ողջ-ողջ թաղեց, բառեր չեմ գտնում  որակելու այդ արարքը: Դուք ի՞նչ  իրավունքով եք նման բան հայտարարում Կոստանդնուպոլսի հայերի անունից: Նա պատասխան պետք է տա իր հայտարարության համար, մեր նպատակն է, որ նա չմտնի Հայաստան»,-ասաց նա:

Գ. Արշակյանի խոսքով, Աթեշյանն իր այս քայլով ապացուցեց, որ հայությունն այսօր էլ սարսափած է ապրում, Թուրքիան ոչ եղել է, ոչ էլ կդառնա ժողովրդավարական երկիր:

Նախաձեռնության անդամի խոսքով, Սուրբ Էջմիածինը թաքուն է  պահում Աթեշյանի ժամանման մանրամասները: Եթե Աթեշյանին հաջողվի գաղտնի պայմաններում հասնել Մայր աթոռ, ապա Արշակյանի խոսքով՝ իրենք բողոքի միջոցառումներից զերծ կմնան:

«Հռոմի Պապը եթե այնտեղ եղավ, դժվար թե մենք նման քայլերի գնանք, մի ծախու լրատվական էլ կարող է ցույց տալ, որ Հայաստանում բողոքի ակցիայով դիմավորեցին Պապին»,-ասաց նա:

«Թույլ չենք տալու Արամ Աթեշյանին Հայաստան մտնել» նախաձեռնության անդամները նամակներ են հղել Գարեգին Բ-ին, Արամ Ա-ին: