Ձեր վստահելի աղբյուրը

Ռուսաստանն ու Սիրիան ներկա պահին Պալմիրայում վերականգնման աշխատանքներ տանելու ուղղությամբ պատրաստում են համաձայնագիր, որը ստորագրվելու է «մոտակա ժամանակներում»: ՏԱՍՍ-ի հաղորդմամբ, այս մասին հայտարարել է  ՌԴ նախագահի միջազգային մշակութային համագործակցության հարցերով հատուկ ներկայացուցիչ Միխայիլ Շվիդկոյը:

«Նախ և առաջ մենք պետք է Ռուսաստանի և Սիրիայի միջև համաձայնագիր կնքենք և միայն դրանից հետո Ռուսաստանը կարող է իրական մասնակցություն ունենալ Պալմիրայի վերականգնման աշխատանքներին: Հիմա մենք պատրաստում ենք  այդ համաձայնագիրը»,- ասել է նա:

Մ. Շվիդկոյը նշել է, թե ինչպիսի հայտարարություններ էլ անեն միջազգային կազմակերպությունները, առանց սիրիական կողմի պաշտոնական հրավերի մասնագետներից որևէ մեկը չի կարող օրինական գնալ և աշխատել այնտեղ:

«Հիմա շատ տարբեր առաջարկություններ կան: Մենք հասկանում ենք, որպեսզի այդ օբյեկտները պահպանվեն և վերականգնվեն պատշաճ մակարդակով, անհրաժեշտ են մեծ թվով  լուրջ մասնագետներ»,- ասել է Միխայիլ Շվիդկոյը:

Ըստ նրա, նախ պետք է գնահատվի վերականգնման աշխատանքների ծավալը:  ՌԴ նախագահի հատուկ ներկայացուցիչը նշել է, որ այդ գործընթացը կարագացվի միջպետական պայմանագրի ստորագրումից հետո:

Միաժամանակ նա հավելել է, որ Պալմիրայի վերականգնման աշխատանքներում ակնկալվում է այլ երկրների ակտիվ մասնակցությունը:

«Չի բացառվում է, որ այդ հարցը կքննարկվի հուլիսի 14-16-ը կայանալիք «Սանկտ-Պետերբուրգային երկխոսության» շրջանակում և կընդունվի  որևէ հուշագիր տարբեր երկրների մասնագետների միջև»,- ասել է Մ. Շվիդկոյը:

2015թ-ի մայիսից Պալմիրան գտնվում էր  «Իսլամական պետություն» ահաբեկչական խմբավորման զինյալների հսկողության տակ: Այսօր տարվա մարտի 27-ին սիրիական բանակը և աշխարհազորայիններն ամբողջությամբ ազատագրել են քաղաքը «Իսլամական պետություն»-ից: Քաղաքն ընդգրկված էր ՅՈՒՆԵՍԿՕ-ի վտանգի տակ հայտնված համաշխարհային ժառանգության ցանկում: