Ձեր վստահելի աղբյուրը

Սանկտ Պետերբուրգում արվել է շատ փոքր քայլ, բայց ճիշտ ուղղությամբ: Այսօր լրագրողների հետ հանդիպմանը նման կարծիք հայտնեց Արևելագիտության ինստիտուտի տնօրեն Ռուբեն Սաֆրաստյանն՝ անդրադառնաոլով Սարգսյան-Ալիև հետապրիլյան երկրորդ հանդիպմանը:

«Դեռևս անորոշ է՝ որքանով են ավելացնելու դիտորդները, ինչ ֆինանսավորմամբ, պետք է սպասել, որ քայլերն այս ուղղությամբ ավելի հստակ կլինեն և կշարունակվեն»,-նշեց Սաֆրաստյանը:

Սակայն նրա խոսքով՝ չպետք է մոռանալ, որ գործ ունենք Ադրբեջանի հետ, որն անկանխատեսելի է և ամեն կերպ աշխատում է խաղաղ գործընթացի վրա ազդել. «Դժվար է անկնկալել, հույս ունենալ, որ Ալիևը չի շարունակի իր քաղաքականությունը, որի նպատակն է վիժեցնել խաղաղ գործընթացը»:

Ըստ Սաֆրաստյանի՝ Ռուսաստանն ակնհայտորեն փորձում է խաղաղ  գործընթացի նախաձեռնությունը որոշ չափով իր վրա վերցնել. «Ռուսաստանը, հանդես գալով այս հանդիպման նախաձեռնությամբ, պետք է ամեն ինչ աներ, որ գոնե մի փոքրիկ առաջընթաց լիներ և դա եղավ դիտորդների թվի ավելացման ձևով»:

Գնահատելով Ադրբեջանի վերջին տարիների քաղաքականությունը՝ արևելագետն արձանագրեց, որ նրանք ընտրել են խաղաղ գործընթացի վրա ճնշում գործադրելու իրենց  ռազմավարությունը, ինչի մասին վկայում են նաև վերջին լայնածավալ զորավարժությունները:

Ինչ վերաբերում է Ադրբեջանի ԵԱՏՄ մեջ ընդգրկվելուն՝ Սաֆրաստյանի դիտարկմամբ, Ռուսաստանը ձգտում է դրան, բայց մյուս կողմից էլ համոզված է, որ Ադրբեջանը չի գնա դրան, քանի որ կնշանակի իր նավթի և գազի պաշարների եկամուտների օգտագործման սահմանափակում: