Ձեր վստահելի աղբյուրը

Շփման գծում միջադեպերի հետաքննության մեխանիզմներ ներդրումը Ֆրանսիայի համար կարևորագույն, առանցքային հարց է: Այսօր լրագրողների հետ հանդիպմանը հայտարարեց Հայաստանում  Ֆրանսիայի արտակարգ և լիազոր դեսպան Ժան-Ֆրանսուա Շարպանտիեն:

«Դրա շնորհիվ հնարավորություն է ընձեռվում վստահության միջոցառումների իրականացման համար: Մենք աջակցում ենք այդ միջոցառումների կենսագործմանը: ԵԱՀԿ-ի շրջանակում այսօր էլ շարունակվում են ակտիվ աշխատանքներն այդ ուղղությամբ»,-ասաց ԵԱՀԿ Մինսկի խմբի համանախագահող երկրի դիվանագետը:

Նա հույս հայտնեց, որ նման մեխանիզմների ներդրումը թույլ կտա լույս սփռել նաև ապրիլին տեղի ունեցած իրադարձությունների վրա:

Լրագրողի հարցին, թե ինչպես գնահատում Ադրբեջանի դիրքորոշումը հետաքննության մեխանիզմների ներդրման վերաբերյալ, դեսպանն ասաց չի կարող պատասխանել, քանի որ ինքը Հայաստանում, ոչ թե Ադրբեջանում Ֆրանսիայի դեսպանն է:

Նա չհամաձայնեց այն տեսակետին, որ ապրիլյան քառօրյա պատերազմի ընթացքում միջազգային դիվանգիտությունը թերացավ կամ չաշխատեց: Դեսպանի խոսքով, այս պահին էլ դիվանագետներն ակտիվ աշխատում են, որպեսզի ապրիլյան իրադարձությունները չկրկնվեն:

«Մեր հիմնական խնդիրն այսօր առաջ ընթանալն է, բանակցություններն առաջ տանելը»,-ասաց նա: