Ձեր վստահելի աղբյուրը

«Պետք էր մի կողմից ցույց տալ, որ ստեղծվել են ապրիլյան իրադարձությունները ապագայում բացառող մեխանիզմներ և մյուս կողմից ցույց տալ ադրբեջանական կողմին, որ առկա իրավիճակը դեռ չի նշանակում բանակցային գործընթացի լիակատար սառեցում, սակայն պետք է նախադրյալներ ստեղծվեն իրական բանակցային գործընթացի վերսկսման համար»,- այսօր լրագրողների հետ հանդիպան ժամանակ անդրադառնալով նախօրեին Սանկտ Պետերբուրգում Ռուսաստանի, Հայաստանի և Ադրբեջանի նախագահների միջև կայացած հանդիպմանը՝ այս մասին քաղաքագետ Սերգեյ Մինասյանը՝ հավելելով,  հանդիպման արդյունքները կանխատեսելի էին:

Ըստ քաղաքագետի՝ Մոսկվայի գլխավոր նպատակը թե՛ բանակցային գործընթացում, և թե՛ ԵԱՀԿ Մինսկի խմբի շրջանակներում իր առաջատար դերակատարման ամրագրումն էր:

«Մյուս կողմից համանախագահների ներկայությունը և հանդիպման արդյունքներով ընդունված հայտարարությունը ցույց տվեցին, որ ՌԴ-ն, իհարկե, ցանկանում է ցույց տալ իր առաջատար դերակատարությունը, սակայն Մինսկի ֆորմատի տապալման նպատակ Մոսկվան չունի»,-շեշտեց Սերգեյ Մինասյանը՝ հավելելով, որ սա այն եզակի ձևաչափն է, որի շրջանակներում Արևմուտքն ու Ռուսաստանը կարող են խոսել և գալ ինչ-որ ընդհանուր հայտարարի:

Ինչ վերաբերում է հանդիպման արդյունքներին, ապա ըստ քաղաքագետի՝ առկա իրավիճակից ելնելով հանդիպման նախօրեին ևս սպասելիքները մեծ չէին, իսկ որևէ լուրջ առաջընթաց ակնկալելը ևս իրատեսական չէր: Մյուս կողմից, ըստ բանախոսի՝ չիրականացան նաև այն մեծ մասամբ անհիմն սպասելինքրը, որ ռուսական կողմը պատրաստվում է Երևանի վրա ճնշումներ գործադրելով՝ ստիպել հայկական կողմին գնալ ինչ-որ միակողմանի զիջումների:

«Ռուսաստանում շատ լավ գիտակցում են, որ այս ամենը չի հանգեցնի խնդրի լուծմանը և էլ ավելի կբարդացնի իրավիճակը հատկապես Կրեմլի համար»,-կարծիք հայտնեց Սերգեյ Մինասյանը:

Ըստ քաղաքագետի՝ առկա իրավիճակում Բաքուն կանգնած է երկընտրանքի առջև. կա՛մ հարմարվել առկա ավելի բարդ ստատուս-քվոյին և փորձել ապրիլյան իրադարձությունները սեփական հասարակությանը ներկայացնել որպես լուրջ հաջողություն, կա՛մ էլ գնալ հետագա ռազմական սրացման:

Վերջին ընտրության պարագայումն, ըստ Սերգեյ Մինասյանի, ինչպես ցույց տվեցին ապրիլյան իրադարձությունները, Բաքուն ևս սկսել է ընկալել, որ որևէ լուրջ հաջողության հասնել չի կարող:
Անդրադառնալով հանդիպման արդյունքներով ընդունված հայտարարությանը՝քաղաքագետը նշեց, որ այն բավական հաջողված էր, քանի որ չվնասելով կողմերից որևէ մեկի շահերը, իր մեջ ներառում էր բոլոր կարևոր ու անհրաժեշտ դրույթները:

Ինչ վերաբերում է ավանդույթից շեղվող նմանատիպ հանդիպումներից առաջ ադրբեջանական կողմի ավանդական սադրանքների այս անգամ բացակայությանը, ապա ըստ Մինասյանի Բաքուն, ըստ երևույթին, կարծում է, թե ապրիլյան իրադարձությունները բավարար էին, որպեսզի ցույց տան, որ իրենք համաձայն չեն ստատուս քվոյի պահպանմանը: