Կենսաչափական անձնագրեր առայժմ չեն բաժանվում

Իրավունք 14:35 22/06/2016

Կենսաչափական անձնագրեր առայժմ չեն բաժանվում

Հայաստանում կենսաչափական անձնագրերի բաժանման հետ կապված առաջացել են խնդիրներ: Այդ մասին Panorama.am-ի թղթակցի հետ զրույցում տեղեկացրեց անձնագրային և վիզաների վարչության պետ Մնացական Բիչախչյանը:

Այս օրերին հատկապես դժգոհություն էր առաջացել արտերկիր մեկնող քաղաքացիների շրջանում, ովքեր դիմել էին անձնագրային ծառայություն՝ կենսաչափական անձնագիր ստանալու համար:

Բիչախչյանի ներկայացմամբ, կենսաչափական անձնագրի հետ կապված խնդիրներն առաջացել են քանի որ կենսաչափական անձնագրեր մատակարարող լեհական ընկերությունը պայմանագրով ավարտել է իր պարտավորությունները և հաջորդ խմբաքանակի մատակարարման համար պետք է նոր պայմանագիր կնքվի:

«Նոր բանակցություններ կվարվեն և հետո կսկսվի մատակարարումը», -ասաց Բիչախչյանը՝ չմատնանշելով գործընթացի ավարտի ժամկետներ:

Անձնագրային և վիզաների վարչության պետը հորդորում է քաղաքացիներին արտերկիր մեկնելիս դիմել և ստանալ սովորական, հին նմուշի անձնագիր, որոնք եվրոպական երկրներում ընդունելի են:

«Կան երկրներ, որտեղ դիվանագիտական ծառայություններում բիոմետրիկ համակարգ տեղադրված չէ և այնտեղ ընդունում են հին նմուշի անձնագրեր», -հավելեց Մնացական Բիչախչյանը:

Մեր դիտարկմանը, թե կան երկրներ, որոնք չեն ընդունում ժամկետը երկարացված անձնագրեր, Բիչախչյանը նկատեց, որ դա միջազգային նմուշի փաստաթուղթ է:

«Եթե տասը տարին լրացել է անձնագրի, ապա քաղաքացին կարող է մեկ անգամ հինգ տարով երկարացնել այն: Նույնիսկ այդ երկարացված անձնագրով անձինք մտել ԱՄՆ դեսպանատուն: Կան երկրներ, որոնք երկարացված անձնագրեր չեն ընդունում, բայց դրանք շատ չեն», -նշեց պաշտոնյան:

Ինչ վերաբերում է նույնականացման քարտերին, ապա անձնագրային և վիզաների վարչության պետի փոխանցմամբ, դրանց տրամադրման հետ կապված խնդիրներ չկան:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: