Ձեր վստահելի աղբյուրը

«Մեր խնդիրն է՝ անել ամեն ինչ, որպեսզի գիտություն-կրթություն-բիզնս կապն ամրապնդվի և բուհերի ու տնտեսվարողների  համագործակցության կոնկրետ օրինակներն ավելի ու ավելի շատանան, դրանք, ցավոք, այսօր քիչ են»,- նշել է ՀՀ կրթության և գիտության նախարար Լևոն Մկրտչյանն այսօր  Սինոփսիս Արմենիա ընկերության գիտաարտադրական կենտրոն և ուսումնական դեպարտամենտ այցի ընթացքում:  

ԿԳ նախարարության մամուլի ծառայության հաղորդմամբ՝ նախարարը շեշտել է, որ պետք է հասկանանլ, թե տնտեսությունն ինչ խնդիրներ է դնում կրթական համակարգի առջև. «Մենք ձևավորում ենք պարզ ու ընթացիկ տեխնոլոգիաների՞ վրա հիմնված   կրթակարգ, թե՞ մեր կրթական համակարգն իր մեջ պետք  է ներուժ ունենա  լուծելու խորը ինժեներական և  գիտական հարցեր: Հատկապես եթե մենք ընտրում ենք երկրորդ ճանապարհը, ապա պետք է մեծ ուշադրություն դարձնենք բազային կրթության որակին»:

ԿԳ նախարարը հավելել է, որ բուհերն ու պետությունը չեն կարող ամբողջությամբ իրենց վրա վերցնել տեխնոլոգիական կրթության ապահովման խնդիրը, քանի որ դրա համար առկա ռեսուրսները բավարար չեն: Լևոն Մկրտչյանը վստահություն է հայտնել, որ տնտեսվարողներն ևս զգում են կրթական համակարգի հետ համագործակցության անհրաժեշտությունը:

ՏՏ ոլորոտում առկա կադրային մեծ պահանջարկը, ԿԳ նախարարի համոզմամբ կարող է լուծվել երկու ճանապարհով՝ շուկայի ընթացիկ պահանջարկը, որտեղ նախատեսվում է   հիմնականում աշխատել տեխնոլոգիաներով, կարող  է լրացվել նաև միջին մասնագիտական համակարգի կադրային ռեսուրսով: Այն կլուծի նաև սոցիալական խնդիր՝ հաշվի առնելով ՏՏ ոլորտի բարձր վարձատրությունը: Առավել բարձրակարգ մասնագետների պատրաստման խնդիրը, որտեղ մենք ունենք գիտական ակնկալիքներ պետք է լուծեն առաջատար բուհերը. «Խոսքն այս դեպքում շատ բարձր որակի մասին է, որովհետև որակը դառնում է նաև թելադրող աշխատաշուկայի համար: Այդ տեսանկյունից մենք, բացի աշխատաշուկայի ընթացիկ խնդիրները լուծելուց,  կարևորում ենք նաև խորքային և երկարատև համագործակցությունը»,- նշել է Լ. Մկրտչյանը: