Ձեր վստահելի աղբյուրը

Բրիտանական հեղինակավոր պարբերականները կոչ են արել երկրի քաղաքացիներին չանտեսել ԵՄ կազմից երկրի դուրս գալու հանրաքվեն և այցելել ընտրատեղամասեր: Այս մասին հաղորդում է «Գազետա» ռուսական լրատվական գործակալությունը:

«Financial Times»-ը գրում է, որ Եվրոպայի և Բրիտանիայի համար ճակատագրական պահ է հասունացել: Վերջին 4 ամիսների ընթացքում քննարկումները պառակտել են բրիտանական հանրությանը և այժմ երբ ժողովուրդը պետք է իր խոսքն ասի, թերթը իր պարտքն է համարում կոչ անել ընթերցողներին՝ «գնալ և քվեարկել»: Պարբերականը շեշտում է, որ հանրաքվեի արդյունքները բացարձակ անկանխատեսելի են, և կարևոր է ընտրողի յուրաքանչյուր ձայնը՝ հիշեցնելով, որ ընդունվելիք որոշումն անբեկանելի է: Թերթը նաև ներկայացրել է իր դիրքորոշումն առ այն, որ ԵՄ կազմից Մեծ Բրիտանիայի դուրս գալը կվնասի ոչ միայն Բրիտանիային, այլ նաև Եվրոպային և ընդհանուր Արևմուտքին:

«The Independent» պարբերականը նույնպես կոչ է անում գնալ և քվեարկել «բրիտանական ժողովրդավարության» օգտին: Սակայն, ըստ պարբերականի, ժողովրդավարության գլխավոր ցուցիչը կհանդիսանա ոչ այնքան հանրաքվեի այս կամ այն արդյունքը, այլ մասնակցության ցուցանիշը: Բարձր ցուցանիշը լավ նշան կհանդիսանա:

«The Sun» պարբերականն էլ նույնպես գրում է, պատմական պահի մասին, սակայն այն մեկնաբանությամբ, որ բրիտանացիները կարող են Մեծ Բրիտանիային վերադարձնել անկախությունը: Ըստ թերթի հանրաքվեն «Բրյուսելի հակադեմոկրատական մեքենայից» Մեծ Բրիտանիայի դուրս գալու վերջին շանսն է: Ըստ այդմ, խմբագրությունը կոչ է անում երկրի քաղաքացիներին քվեարկել երկրի՝ ԵՄ կազմից դուրս գալու օգտին:

ԵՄ կազմից դուրս գալու բրիտանական հանրաքվեի առնչությամբ հայտարարւթյամբ է հանդես եկել Եվրահանձնաժողովի ղեկավար Ժան Կլոդ Յունկերը:

Նա հայտարարել է, որ ԵՄ կազմից Մեծ Բրիտանիայի դուրս գալու պարագայում «չպետք է սպասել Բրիտանիայի՝ ԵՄ կազմ վերադառնալու նոր բանակցություններ». Բրիտանիայի վարչապետ Դևիդ Քեմերոնի հետ արդեն ստորագրվել է համապատասխան համաձայնագիրը, ըստ որի՝ Բրիտանիան հասել է նրան, ինչին, որ կարողացել է, իսկ Եվրոպան տվել է այն, ինչ կարող էր: