Ձեր վստահելի աղբյուրը

Անաստվածության երկար տարիների հոգևոր կործանումից, երկրաշարժի սարսափելի նյութական ավերածություններից հետո, այսօր գտնվում ենք այստեղ՝ Աստծո շնորհակալությունը հայտնելու հավատը դավանելու, ազատության և առատաձեռնության համար, որ բազում մարդկանց օգնեց վերականգնելու իրենց կյանքը՝ հսկայական դժվարություններով հանդերձ,- Գյումրիի Վարդանանց հրապարակում  լատինական ծեսով մատուցած  Սուրբ Պատարագի ժամանակ ասաց Հռոմի Սրբազան Քահանայապետ Նորին Սրբություն Ֆրանցիսկոս Պապը:

Նա նշեց, որ արդար սերը Աստծուց ստացած և ընկերոջ ընծայած սերն է. «Գթառատ և թանձրացյալ սերը քրիստոնյայի այցեքարտն է: Կոչված ենք միշտ կառուցելու և վերակառուցելու հաղորդությունն առանց երբեք հոգնելու, կոչված ենք կամուրջներ սարքելու, ոչ թե պարիսպներ կամ բաժանարար պատնեշներ:

Ինչպես Եսայի մարգարեն է ասում՝ Աստված բնակվում է սիրողի մեջ,  Աստված բնակվում է, որտեղ սիրում են իրար, հատկապես որտեղ տկաներին, աղքատներին են խնամում: Նա միշտ օրհնում է նրան, ով բարի լուրն է տանում թշվառներին, կոտրված սրտերի վերքերն է պատում,  մխիթարում է վշտացածներին:  Սրա կարիքը շատ ունենք: Կարիք ունենք քրիստոնյաների, որ  հոգնությունից չխորտակվեն, չհուսալքվեն  փոխադարձ անհասկացողություններից,  այլ բացվեն Աստծո սիրո ծրագրերին: Բարի կամքով մարդկանց կարիքը կա, որ գործնականում և ոչ թե խոսքերով օգնեն դժվարության մեջ գտնվող եղբայրներին, քույրերին, կարիքը կա ավելի արդար հասարակության, որտեղ յուրաքանչյուրը կարողանա արժանավայել կյանք վարել, արդարորեն հատուցվող աշխատանք»:

Հռոմի պապն իր քարոզում անդրադարձավ նաև Գրիգոր Նարեկացուն. «Նա Կարապետն ու Մարգարեն էր աստվածային ողորմության: Դժվար է գտնել որևէ մեկին, որ հավասարի նրան:  Նարեկացին ոչ միայն Վարդապետ է ուսուցման, այլ հատկապես կյանքի, որովհետև սովորեցնում է, թե ինչքան կարևոր է ճանաչել ինքներս մեզ»: