Ձեր վստահելի աղբյուրը

«Հայաստանում Հռոմի պապի այցի երկրորդ օրը սկսվեց Ծիծեռնակաբերդի հուշահամալիր այցելությամբ, շատ զգացական պահ էր»,- Գյումրիի մամուլի կենտրոնում  հայաստանցի և արտասահմանցի լրագրողների հետ հանդիպման ժամանակ ասաց Հռոմի պապի խոսնակ մոնսինյոր Ֆեդերիկո Լոմբարդին: 

«Հռոմի պապն այնտեղ ճառ չարտասանեց, քանի որ ավելի շատ խորհելու, մտորելու, աղոթելու պահեր էին: Ընդհանրապես, Հռոմի պապի ոճին ավելի շատ հարիր է լռությունն ու աղոթքը»,- նշեց նա:

Հռոմի պապի խոսնակի խոսքով, Հայոց ցեղասպանության ինտիտուտ-թանգարանի պատվո այցելուների գրքում Սրբազան Քահանայապետը գրել է ոչ միայն նախապես պատրաստված խոսքեր, այլև ավելացրել է մի քանի խոսք, որոնք բխում են այս օրերի իր  փորձառությունից:

Ըստ նրա, Հռոմի պապը ժամանակ չունեցավ  այցելելու թանգարան, բայց թանգարանում պահվում է մի կարևոր փաստաթուղթ՝ Բենեդիկտոս 15-րդի նամակն Օսմանյան սուլթանին, որով նա ուզում էր միջամտել հայերի ցեղասպանությանը. «Կարևոր պատմական փաստաթուղթ է:  Հայերը  շնորհակալ են նրան այդ միջամտության համար հանուն իրենց փրկության»:

«Այս առավոտ ցնծությամբ տեսանք նաև սքանչելի լուսապայծառ Արարատ լեռը»,- ասաց նա:

Խոսելով Գյումրիի Վարդանանց հրապարակում Ֆրանցիսկոս պապի կողմից լատինական ծեսով մատուցված պատարագի մասին, Ֆեդերիկո Լոմբարդին նշեց, որ Գյումրիի համար պատմական օր էր: