Ձեր վստահելի աղբյուրը

20։23
Հանրապետության հրապարակում խաղաղության միասնական աղոթքից հետո Հռոմի Սրբազան Քահանայապետը մոտեցավ հրապարակում գտնվող հաշմանդամության սայլակով տեղաշարժվող մարդկանց, համբուրեց, օրհնության բաշխեց նրանց:

Այնուհետ Հռոմի պապն ու Գարեգին Երկրորդը հեռացան Հանրապետության հրապարակից:

Այս պահին հրապարակում շարունակվում է Սրբազան Քահանայապետին նվիրված տոնական համերգը՝ Հայաստանի Ազգային ֆիլհարմոնիկ նվագախմբի և Հայաստանի Ազգային ակադեմիական երգչախմբի մասնակցությամբ:



20։17
Հանրապետության հրապարակում խաղաղության միասնական աղոթքից հետո երկու հովվապետերին մոտեցան Մերձավոր Արևելքից ժամանած ընտանիքների մանուկներ, ովքեր Ամենայն Հայոց Կաթողիկոսին և Հռոմի Սրբազան Քահանայապետին մատուցեցին օրհնության համար իրենց երկրներից բերված հողով և ջրով լցված սափոր: Հողը և ջուրն օրհնելուց հետո այն լցվեց բեմահարթակի վրա դրված Նոյյան տապանի մանրակերտի մեջ:

Տասներկու երեխաները կրում են հայկական պատմական նահանգների ավանդական զգեստները: Նրանցից շատերը Հայոց ցեղասպանությունը վերապրածների ժառանգներ են, որոնք ապաստանեցին Մերձավոր Արևելքի տարբեր երկրներում: Այս երեխաները ժամանել են Սիրիայի տարբեր շրջաններից, Լիբանանից, Իրաքից, Արաբական Միացյալ Էմիրություններից, Իսրայելից, Հորդանանից, Եգիպտոսից, Քուվեյթից, նաև Իրանից և Թուրքիայից:

Երեխաների խմբի վերջին զույգը Հայաստանից է: Նրանք խորհրդանշում են հայ ժողովրդի վերածնունդն իր պատմական հայրենիքի այս հատվածում: Շարքի առջևից քայլում է հոգևորական, ձեռքին՝ խաղողի վազ՝ կավե ամանի մեջ: Նա մոտենում է Նոյան տապանի մանրակերտին, կոտրում կավե ամանը և խաղողի վազը տնկում է Նոյյան տապանի մանրակերտի մեջ: Այսպիսով, կոտրվում է քարացած բնությունը և, կարծես, տնկվում է, առաջին ծառը՝ որթատունկը: Այն խորհրդանշում է փրկության և վերածննդի ուղին անցած Նոյ նահապետին, ով բիբլիական Արարատից իջնելով՝ տնկեց որթատունկը: Այնուհետև երեխաները մեկ առ մեկ մոտենում են և իրենց ձեռքում պահած սափորի միջի հողը լցնում Տապանի մանրակերտի մեջ:

Նոյյան Տապանի այս մանրակերտը հեղինակել է հայտնի ամերիկահայ դիզայներ Մայքլ Արամը Նյու Յորքից: Այս մանրակերտը Հայաստանը նվիրաբերվելու է Հռոմի Սրբազան Քահանայապետին, և այն Երևանից տեղափոխվելու է Վատիկան:

20։12
Հանրապետության հրապարակում առաջին անգամ հնչում է Գարրի Քեսայանի «Ավե, Մարիա» ստեղծագործությունը՝ գրված սոպրանոյի և նվագախմբի համար: Հեղինակն այս գործն ամբողջականացրել և նվիրել է Սրբազան Քահանայապետ Նորին Սրբություն Հռոմի Պապ Ֆրանցիսկոսի Հայաստան այցին:

Մենակատարն է գերմանաբնակ հայազգի սոպրանո Հրաչուհի Բազենց: Նա բազմաթիվ հեղինակավոր մրցույթների դափնեկիր է: Իր առաջին հեղինակավոր դեբյուտը կայացել է Վերդիի «Տրուբադուր» օպերայից Լեոնորայի արիայով:

20։08
Հանրապետության հրապարկում իրենց ուղերձները հղեցին Ամենայն Հայոց Կաթողիկոս Գարեգին Երկրորդը և Հռոմի Պապը:

Ֆրանցիսկոս Պապի ուղերձի վերջին հնչեց Գեորգ Հենդելի՝ Hallelujah օրատորիան: Այս գործն Աստծուն ուղղված փառաբանական հիմն է: Գերմանացի հռչակավոր կոմպոզիտոր Հենդելը իրավացիորեն համարվում է օրատորիայի ժանրի հիմնադիրը: Բեմում են Հայաստանի Ազգային ֆիլհարմոնիկ նվագախումբը և Հայաստանի Ազգային ակադեմիական երգչախումբը: Դիրիժորական վահանակի մոտ է ժողովրդական արտիստ, մաէստրո Հովհաննես Չեքիջյանը:

19։50
Շատ էի փափագում այցելել այս սիրելի երկիրը, Ձեր աշխարհը, որ առաջինն ընդունեց քրիստոնեական հավատ: Ինձ համար առանձնաշնորհություն է գտնվել այս բարձունքների վրա, որտեղ Արարատ լեռան հայացքի ներքո նույնիսկ լռությունը մեզ խոսուն է թվում, խաչքարերը մեզ պատմում են անկրկնելի մի պատմություն՝ ամրակուռ հավատով և սոսկալի տառապանքներով հյուսված,- Հանրապետության հրապարակում խաղաղության միասնական աղոթքն այսպես սկսեց Հռոմի պապը:

«Գալիս եմ Հռոմից ուխտավոր՝ Ձեզ հետ հանդիպելու, և սրտի խորքից բխող իմ զգացումն արտահայտելու: Այն Ձեր եղբոր սերն է, եղբայրական գրկախառնումն է ամբողջ Կաթողիկե եկեղեցու, որ Ձեզ սիրում է և Ձեր կողքին է»,- իր խոսքում ասաց Սրբազան Քահանայապետը:

19։36
Երանի խաղաղարարներին, որովհետև նրանք Աստծո որդիներ պետք է կոչվեն,- Հանրապետության հրապարակում խաղաղության միասնական աղոթքն այսպես սկսեց Ամենայն Հայոց Կաթողիկոս Գարեգին Երկրորդը:

«Հուզմունքով ենք անդրադառնում, որ այս հրապարակում մեզ աղոթակից են նաև պատերազմից, ահաբեկչութոներից, բռնություններից տուծաժներ, փախստականներ Ադրբեջանից, Սիրիայից, Իրաքից:

Մեկ դար առաջ այս նույն ճանապարհն էր անցում մեր ժողովուրդը՝ հայտնվելով ծանրագույն իրավիճակի առաջ, երբ Ցեղասպանության հետևանքով կորցրել էր Հայրենիքի մեծ մասը:  Ունենալով 1,5 միլիոն անմեղ նահատակներ՝ պայքարում էր իր գոյության իրավունքի համար:

Այսօր էլ մեր ժողովուրդն ապրում է չհայտարարված պատերազմի դժվարին պայմաններում՝ թանկ գնով պաշտպանելով խաղաղությունը մեր երկրի սահմաններում»,- իր խոսքում ասաց Գարեգին Երկրորդը:

Ամենայն Հայոց Կաթողիկոսից հետո խաղաղության իր աղոթքն է հղելու Հռոմի պապը:

19։31
Կաթոլիկ եկեղեցու հոգևորական. «Համերաշխ եղեք միմյանց հետ, մի մեծամտացեք, խոնարհ եղեք, դուք ձեզ իմաստունի տեղ մի դրեք: Չարի փոխարեն չարությամբ մի հատուցեք: Հնարավորինս բարին արեք մարդկանց համար: Բոլորի հետ խաղաղություն պահեցեք: Ինքներդ վրեժխնդիր մի եղեք, սիրելիներ, այլ թույլ տվեք, որ Աստծո բարկությունը կատարի այն, որովհետև Տերն ասում է. «Իմն է վրեժխնդրությունը և ես կհատուցեմ այն»»:

19։22
Հանրապետության հրապարակում մեկնարկեց էկումենիկ արարողությունը և խաղաղության աղոթքը՝ Գարեգին Երկրորդ Ամենայն Հայոց Կաթողիկոսի և Հռոմի Սրբազան Քահանայապետ Ֆրանցիսկոս Պապի հանդիսապետությամբ:

Հնչեց Քրիստոսի հրաշափառ Սուրբ Հարությանը նվիրված շարականը, որին հաջորդեց սուրբգրային ընթերցումներն ու աղոթքները խաղաղության համար:

19։05
Երևանի բոլոր եկեղեցիների զանգեր ղողանջում են՝ ազդարարելով Հանրապետության հրապարակում կայանալիք էկումենիկ արարողության և խաղաղության աղոթքի սկիզբը:

Ամենայն Հայոց Կաթողիկոս Գարեգին Երկրորդը և Հռոմի Սրբազան Քահանայապետ Ֆրանցիսկոս Պապը եկեղեցականների թափորի ուղեկցությամբ շարժվում են հատուկ էկումենիկ արարողություն և խաղաղության աղոթքի առիթով հրապարակում պատրաստված բեմահարթակ:

Այնտեղ նրանք միասնական աղոթք կբարձրացնեն աշխարհում խաղաղության համար:

18։19
Երևանի գլխավոր հրապարակում մեկնարկում է Էկումենիկ արարողություն և խաղաղության աղոթք Ամենայն Հայոց Կաթողիկոս Գարեգին Երկրորդ և Հռոմի Սրբազան Քահանայապետ Ֆրանցիսկոս Պապի հանդիսապետությամբ:

Արարողությանը մասնակցում են մայրաքաղաք Երևանից և Հայաստանի տարբեր մարզերից հազարավոր մարդիկ, նաև Հայ Եկեղեցու աշխարհասփյուռ թեմերից և այլ երկրներից ժամանած ուխտավորներ: Էկումենիկ արարողությանը ներկա են ՀՀ նախագահ Սերժ Սարգսյանը և տիկին Ռիտա Սարգսյանը, Ազային ժողովի պատգամավորներ, կառավարության անդամներ, Երևանում աշխատող դիվանագիտական կորպուսի ներկայացուցիչներ:

Հրապարակում  համերգ է, որ  նախորդում է և հաջորդելու է էկումենիկ արարողությանը և խաղաղության աղոթքին: Հայաստանի Ազգային ֆիլհարմոնիկ նվագախումբը (գեղարվեստական ղեկավար և գլխավոր դիրիժոր՝ Էդուարդ Թոփչյան) ներկայացնելու են հանդիսավոր համերգային ծրագիրը՝ մասնակցությամբ հայ դասական երաժշտության անվանի մենակատարների: Համերգին մասնակցելու Հովհաննես Չեքիջյանի ղեկավարած Հայաստանի Ազգային ակադեմիական երգչախումբը:

Համերգը կմեկնարկի Ալեքսանդր Հարությունյանի «Տոնական նախերգանք»- ով, հնչելու են հատվածներ Արամ Խաչատրյանի «Սպարտակ» բալետից. Ադաջո և «Սպարտակի հաղթանակը», Էդվարդ Միրզոյանի «Սիմֆոնիկ պարեր» սյուիտ, «Շուշանիկ» ստեղծագործություններից, Գեորգ Հենդելի՝ «Հալլելույա», Գարի Քյոսեյան՝ «Ավե Մարիա» (մեներգչուհի՝ Հրաչուհի Բազենց (Գերմանիա)), Էդվարդ Էլգարի՝ Հանդիսավոր քայլերգ թիվ 1 գործեը, հատվածներ իտալացի աշխարհահռչակ կոմպոզիտոր Ջուզեպպե Վերդիի «Ճակատագրի ուժը», «Նաբուկո» , «Աիդա» օպերաներից: Հնչելու է նաև Մորիս Ռավելի՝ «Բոլերո», Կոմիտաս/Ասլամազյանի՝ «Երկինքն ամպելա», Յուրի Չուգուևի՝ «Աղավնիներ», «Պիկասսո՝ սիմֆոնիկ պատկերներ» ստեղծագործությունները: Համերգը եզրափակվելու է է Արամ Խաչատրյանի «Սուսերով պարով»:

18։08
Գյումրիում Սրբազան Քահանայապետն այցելել է Հայաստանյայց Առաքելական Սուրբ Եկեղեցու Շիրակի թեմի առաջնորդանիստ Յոթ Վերք Սուրբ Աստվածածին եկեղեցի: Հռոմի պապը օրհնել է եկեղեցու մոտ հավաքված հաշմանդամություն ունեցող երեխաներին:

Սբ. Աստվածածին եկեղեցին կառուցվել է 1882-1887 թթ. նախկին փայտաշեն եկեղեցու տեղում: Այստեղ գտնվող Աստվածամոր սրբապատկերի անունով, որ 1830 թ. Գյումրի են բերել էրզրումցի գաղթականները, եկեղեցին առայսօր կոչում են նաև Յօթ Վերք:

Թափորով երկու Հովվապետերը զանգերի ղողանջների ուղեկցությամբ մուտք գործեցին եկեղեցի, ուր «Ուրախ լեր» շարականի ներքո առաջացան դեպի ատյան: Եկեղեցու Ավագ Խորանին դրված Աստվածածնի Յոթ վերք սրբապատկերի առջև Վեհափառ Հայրապետը և Հռոմի Պապն առանձնական աղոթք ասացին, որից հետո Ֆրանցիսկոս Պապն օրհնեց ներկա ժողովրդին:

Եկեղեցու մուտքի առջև երկու Հովվապետերն իրենց օրհնությունը բաշխեցին նաև հաշմանդամ երեխաների:

Այնուհետև Նորին Սրբությունը և Հռոմի Սրբազան Քահանայապետն այցելեցին նաև Գյումրիի հայ կաթոլիկ առաջնորդանիստ Սրբոց Նահատակաց եկեղեցի: Եկեղեցու առջև նրանց դիմավորեցին Տ. Ռաֆայել արքեպիսկոպոս Մինասյանը, եկեղեցականներ և հայ կաթոլիկ համայնքի ներկայացուցիչներ:

Երկու Հովվապետերի առանձնական աղոթքից հետո Ամենայն Հայոց Հայրապետը «Պահպանիչ» աղոթքով օրհնեց հայ կաթոլիկ համայնքի ներկայացուցիչներին և հաշմանդամ երեխաների:
Դուրս գալով Սրբոց Նահատակաց եկեղեցուց` Ամենայն Հայոց Կաթողիկոսը և Հռոմի Սրբազան Քահանայապետը, հրաժեշտ տալով Գյումրիին, վերադարձան Երևան:

18:04
Վարդանանց հրապարակում մատուցած Սուրբ պատարագից հետո Սրբազան Քահանայապետն ուղղվեցավ Անարատ Հղության Հայ քույրերի միաբանության՝ «Տիրամայր Հայաստանի» կուսաստան:

«Ռադիո Վատիկան»-ի փոխանցմամբ՝  Հռոմի Պապը հանդիպում է ունեցել կենտրոնի բնակիչների, միաբանության անդամների ու կենտրոնի աշխատակազմի հետ:

13.22
Գյումրիի Սուրբ Վարդանանց հրապարակում մատուցված Սուրբ Պատարագից հետո  Ամենայն Հայոց Կաթողիկոսն ու Հռոմի  պապը պապամոբիլով շրջում են հրապարակում՝ օրհնության բաշխելով հավաքված հազարավոր հավատացյալներին:

13.20
Գյումրիի Սուրբ Վարդանանց հրապարակում Հռոմի Սրբազան Քահանայապետ Նորին Սրբություն Ֆրանցիսկոս Պապի կողմից լատինական ծեսով մատուցված Սուրբ Պատարագը ավարտվեց:

Հայ-կաթողիկե ավելի քան երկդարյան պատմության մեջ առաջին անգամ կաթոլիկ եկեղեցու Սրբազան Քահանայապետը Սուրբ Պատարագ մատուցեց  Հայաստանի կաթոլիկների հոգևոր  մայրաքաղաք համարվող Գյումրիում:

«Շնորհակալություն եմ հայտնում  ներկաներին, հոգևոր դասին, պաշտոնյաներին, ովքեր մասնակցեցին Սուրբ Պատարագին: Շնորհակալ եմ բոլոր մասնակիցներին, ովքեր Գյումրի էին հասնել նաև տարբեր գավառներից,  Վրաստանից»,- իր խոսքում ասաց Հռոմի պապը:

Նշենք, որ Գյումրիում Սրբազան Քահանայապետն այցելելու է Անարատ Հղության Հայ քույրերի միաբանության «Տիրամայր Հայաստանի» կուսաստան, Հայաստանյայց Առաքելական Սուրբ Եկեղեցու Շիրակի թեմի առաջնորդանիստ Յոթ Վերք Սուրբ Աստվածածին եկեղեցի և Սրբոց Նահատակաց հայ կաթողիկե Մայր Տաճար:

12.51
Գյումրիի Սուրբ Վարդանանց հրապարակում Սուրբ Պատարագի ժամանակ Հռոմի Սրբազան Քահանայապետ Նորին Սրբություն Ֆրանցիսկոս Պապը մոտեցավ հավատացյալներին՝ բաշխելու հաղորդություն: Նրան միացան նաև մյուս համապատարագիչները, քահանաները: Հաղորդությունից հետ Սրբազան Քահանայապետն աղոթեց և կոչ արեց աղոթել միասին:

12.15
Գյումրիի Սուրբ Վարդանանց հրապարակում Գարեգին Երկրորդ Ամենայն Հայոց Կաթողիկոսի խոսքից և Հռոմի Սրբազան Քահանայապետ Նորին Սրբություն Ֆրանցիսկոս Պապի քարոզիչ հետո տարբեր լեզուներով կատարվեցին ընդհանրական աղոթքներ:

«Ընդունիր Տեր Աստված մեր աղոթքները, և թող քո շնորհները թափվի մեզ վրա՝  հանուն Մեր Տեր Հիսուս Քրիստոսի»,- ասաց Սրբազան Քահանայապետը:

11.19
Գյումրիի Սուրբ Վարդանանց հրապարակում սկսվեց  լատինական ծեսով Սուրբ Պատարագը, որը մատուցում է  Հռոմի Սրբազան Քահանայապետ Նորին Սրբություն Ֆրանցիսկոս Պապը՝  Ամենայն Հայոց Կաթողիկոսի աղոթակցությամբ:





10.55
Հռոմի Սրբազան Քահանայապետ Նորին Սրբություն Ֆրանցիսկոս Պապն արդեն Գյումրիում է: Սուրբ Վարդանանց հրապարակում Ամենայն Հայոց Կաթողիկոսի աղոթակցությամբ Սրբազան Քահանայապետը կմատուցի Սուրբ Պատարագ լատինական ծեսով: 

Արարողության սկզբին կհնչի Գարեգին Երկրորդ Ամենայն Հայոց Կաթողիկոսի խոսքը: Սուրբ Պատարագի ընթացքում կհնչի Հռոմի Սրբազան Քահանայապետ Ֆրանցիսկոս Պապի քարոզը: 

Արարողության ավարտին  Ֆրանցիսկոս պապը կշրջի պապամոբիլով:

09.33
Բարեխոսական կարգի արարողության ավարտին ՀՀ Նախագահ Սերժ Սարգսյանը, Հռոմի Սրբազան Քահանայապետ Ֆրանցիսկոս Պապը, Գարեգին Երկրորդ Ամենայն Հայոց Կաթողիկոսն անմար կրակի մոտից բացօթյա մեքենայով գնացին դեպի Հայոց ցեղասպանության թանգարան-ինստիտուտ: Հիշողությունների պուրակում Ֆրանցիսկոս Պապը օրհնեց իր անվամբ տնկված եղևնին: Նորին սրբություն Ֆրանցիսկոս պապի՝ Հայաստան այցի առիթով տնկված ծառի հուշատախտակին գրված է՝ «Հիշողությունից բողբոջում է խաղաղ ապագան»

Հռոմի Սրբազան Քահանայապետը գրառում կատարեց Հայոց Ցեղասպանության թանգարան-ինստիտուտի պատվո այցելուների գրքում: Թանգարանի տնօրեն Հայկ Դեմոյանը Հռոմի սրբազան քահանայապետին նվիրեց թանգարանի հուշամեդալ և Ախթամարի եկեղեցու պատկերով գծանկար:

Ֆրանցիսկոս պապը շնորհակալություն հայտնեց Հայոց ցեղասպանության թանգարան-ինստիտուտի տնօրենին՝ օրհնելով նրա առաքելությունը:

Հռոմի պապին մոտեցան Հայոց ցեղասպանությունը վերապրածների մի խումբ ժառանգներ՝ զավակներ և թոռներ: Նրանց նախնիները, Մեծ Եղեռնի որբեր լինելով, Պիուս Տասնմեկերորդ Պապի որոշմամբ օթևան էին գտել պապական Կաստել Գանդոլֆո դղյակ-ամառանոցում:

Ծիծեռնակաբերդի հուշահամալիրից Ֆրանցիսկոս Պապը և Գարեգին Երկրորդն ուղևորվեցին  դեպի Գյումրի:

09.11
Ծիծեռնակաբերդի հուշահամալիրում կատարվեց բարեխոսական կարգի արարողությունը՝ հայցելով այլևս սրբադասված նահատակների բարեխոսությունը: Հիշեցնենք, որ Հայոց Եկեղեցու կողմից Ցեղասպանության զոհերը սրբադասվել են 2015 թվականի ապրիլի 23-ին:

Այնուհետև հնչեց  Հայոց Ցեղասպանության նահատակներին նվիրված շարականը, որը հեղինակել է Գերաշնորհ Տ. Զարեհ արքեպիսկոպոս Ազնավորյանը: Հնչեց նաև հայկական դուդուկ՝ վաստակավոր արտիստներ Գևորգ Դաբաղյանի և Կամո Սեյրանյանի, Հայաստանի ժողովրդական արտիստ Ջիվան Գասպարյանի  կատարմամբ:

08.47
Հռոմի Սրբազան Քահանայապետ Նորին Սրբություն Ֆրանցիսկոս Պապն արդեն Ծիծեռնակաբերդում՝ Հայոց ցեղասպանության զոհերի հուշահամալիրում է:

Հռոմի Սրբազան Քահանայապետ Նորին Սրբություն Ֆրանցիսկոս Պապին և Ամենայն Հայոց Կաթողիկոսին դիմավորեցին Հայաստանի Հանրապետության Նախագահ Սերժ Սարգսյանը և տիկին Ռիտա Սարգսյանը: Հանդիսավոր թափորը պատվո պահակների առաջնորդությամբ շարժվեց դեպի Հայոց Ցեղասպանության նահատակների հուշարձան: Ի հիշատակ նահատակների՝ Պապը ծաղկեպսակ դրեց:

Հռոմի Սրբազան Քահանայապետ Նորին Սրբություն Ֆրանցիսկոս Պապն  Հայաստան կատարած այցի երկրորդ սկսել է Ծիծեռնակաբերդ՝ Հայոց ցեղասպանության զոհերի հուշահամալիր այցելությամբ: Այնտեղ կատարվելու է Բարեխոսական կարգ: Այս արարողությունը կատարվում է Հայոց ցեղասպանության նահատակների հիշատակության օրը, ինչպես նաև հատուկ առիթներով` հայցելով այլևս սրբադասված նահատակների բարեխոսությունը:  Հիշողությունների պուրակում Ֆրանցիսկոս Պապը օրհնելու է իր անվամբ տնկված եղևնին:

Այնուհետև Ամենայն Հայոց կաթողիկոս Գարեգին Երկրորդը և Հռոմի պապը մեկնելու են օդանավակայան և ինքնաթիռով  ժամանելու Գյումրի: Գյումրիում,  ժամը 11:00-ին Սուրբ Վարդանանց հրապարակում Ամենայն Հայոց Կաթողիկոսի աղոթակցությամբ Սրբազան Քահանայապետը կմատուցի Սուրբ Պատարագ լատինական ծեսով: Գյումրիում Ֆրանցիսկոս Պապը նաև կայցելի Անարատ Հղության Հայ քույրերի միաբանության «Տիրամայր Հայաստանի» կուսաստան, Հայաստանյայց Առաքելական Սուրբ Եկեղեցու Շիրակի թեմի առաջնորդանիստ Յոթ Վերք Սուրբ Աստվածածին եկեղեցի և Սրբոց Նահատակաց հայ կաթողիկե Մայր Տաճար:

Այսօր, ժամը 18.00-ին Երևանի Հանրապետութան հրապարակում տեղի կունենա Էկումենիկ արարողություն և խաղաղության աղոթք ՝ Գարեգին Երկրորդ Ամենայն Հայոց Կաթողիկոսի և Հռոմի Սրբազան Քահանայապետ Ֆրանցիսկոս Պապի հանդիսապետությամբ: Իսկ մինչ այդ հրապարակում տեղի կունենա համերգ: Հայաստանի Ազգային ֆիլհարմոնիկ նվագախումբը՝ գեղարվեստական ղեկավար և գլխավոր դիրիժոր՝ Էդուարդ Թոփչյան, ներկայացնելու է հանդիսավոր համերգային ծրագիրը՝ հայ դասական երաժշտության անվանի մենակատարների մասնակցությամբ: Համերգին մասնակցելու  է Հովհաննես Չեքիջյանի ղեկավարած Հայաստանի Ազգային ակադեմիական երգչախումբը:

Հիշեցնենք, որ Հռոմի պապը Հայաստան է ժամանել նախօրեին: 

Հեռարձակումը  երեք լեզուներով է՝ հայերեն, ռուսերեն,  անգլերեն: