Ձեր վստահելի աղբյուրը

Արաբական ԶԼՄ-ներն ակտիվորեն անդրադարձել են Հռոմի Պապի Հայաստան կատարած այցելությանը, որտեղ առավել ակտիվ են եղել հատկապես լիբանանյան, եգիպտական և սիրիական  լրատվամիջոցները:

Արաբական լրատվամիջոցները իրենց տեղեկատվություններում ոչ միայն անդրադարձել են Հռոմի Պապի Հայաստան կատարած այցելության մանրամասներին, այլև Հռոմի Սրբազան Քահանայապետի հնչեցրած հայտարարություններին:

Մասնավորապես «Ալ-Նաշրա» լիբանանյան համացանցային ռեսուրսում տեղ գտած նյութում խոսվել է այն մասին, որ Հռոմի Պապի այցելությունը Հայաստան տևելու է 3 օր: Ֆրանցիսկոս Պապն աղոթելու է Հայոց Ցեղասպանության զոհերի հուշահամալիրում: Լիբանանյան կայքէջում զետեղված նյութում նշվել է նաև, որ Հռոմի Պապը  Օսմանյան կայսրությունում 1.5 մլն հայերի կոտորածը որակել է «20-րդ դարի առաջին ցեղասպանություն» :

Եգիպտական հեղինակավոր «Յոմ ալ-Սաբիա» համացանցային ռեսուրսի հրապարակած նյութում ոչ միայն նշվել է, որ Հռոմի Պապ Ֆրանցիսկոսը 1915 թ. հայերի զանգվածային ջարդերը որակել է ցեղասպանություն, այլև, որ ցեղասպանություն եզրույթը Հռոմի Պապի կողմից կիրառվել է երկրորդ անգամ, որը Թուրքիան անընդունելի է համարում:

Սիրիական «Սանա» լրատվական գործակալության կողմից հրապարակված նյութում մեջբերվել է Ֆրանցիսկոս Պապի խոսքերն առ այն, որ հայ ժողովուրդը իր պատմության ողբերգական փուլերում կարողանում է գտնել առաջ շարժվելու համար անհրաժեշտ ներուժ:

Մի շարք արաբական կայքէջեր, մասնավորապես «Ալ-Նահար», «Ալ-Դիյար»,  «Ալ-Կալիմա» համացանցային ռեսուրսները հետևյալ գլխագրով են հանդես եկել` «Հռոմի Պապը դատապարտում է հայերի ցեղասպանությունը Հայաստանի նախագահի առաջ»: