Ձեր վստահելի աղբյուրը

«Եթե ինչ-որ մեկն ուշադիր լսում է Հռոմի պապի ասածը, կամ կարդում է գրածը՝ այնտեղ ոչ մի բան չկա, որը կարող է մեկնաբանվել որպես «խաչակրաց արշավանքների ոգի»: Սա երկխոսության, խաղաղություն կառուցելու, կամուրջների գցելու ոգի է, այլ ոչ թե՝ մարտնչելու, պատերազմելու: Այս իմաստով ես կարող եմ  ընդամենը հորդորել ճիշտ կարդալ, ընկալել  Հռոմի պապի ասածն ու գրածը,- Էջմիածնի մամուլի կենտրոնում հայաստանցի և արտասահմանցի լրագրողների հետ հանդիպմանն ասաց Հռոմի պապի խոսնակ մոնսինյոր Ֆեդերիկո Լոմբարդին` պատասխանելով հարցին, թե ինչպե՞ս կմեկնաբանեք  Թուրքիայի փոխվարչապետ Նուրեթթին Ջանիքլիի հայտարարությունը Հայաստանում Հռոմի պապի ունեցած ելույթի վերաբերյալ:

«Ես հասկանում եմ, որ այլ տեսանկյուններ էլ կան աշխարհում տիրող պրոբլեմների, լարվածության վերաբերյալ, բայց Հռոմի պապի իրական մտադրությունը  միշտ եղել է և մնում է ժողովուրդների միջև խաղաղության, երկխոսության հիմքեր գցել: Նա  նաև աղոթել է հանուն դրա, ցանկություն հայտնել, որ հաշտություն տեղի ունենա բոլորի միջև: Նա որևէ խոսք չի արտասանել թուրք ժողովրդի դեմ, նա խոսել է հաշտեցման ցանկության մասին՝ նաև թուրքերի ու հայ ժողովրդի միջև: Այս իմաստով որևէ խաչակրաց պահ չեմ տեսնում»,- ասաց Ֆ. Լոմբարդին:

Հիշեցնենք, որ  Թուրքիայի փոխվարչապետը մասնավորապես ասել էր.  «Պապի նման հայտարարությունը ևս մեկ անհաջողություն է, և նրա գործունեության մեջ էլ երևում են խաչակրաց հոգեբանության հետքերը: Նրա հայտարարությունը ոչ օբյեկտիվ, իրականության հետ կապ չունեցող հայտարարություն է, և դա բոլորը, ողջ աշխարհը գիտի: Հայերն էլ գիտեն»:

Հունիսի 24-ին նախագահական նստավայրում ունեցած ելույթում Հռոմի պապն ասել էր. «Այդ ողբերգությունը, այդ ցեղասպանությունը, ցավոք, գլխավորեց անցյալ դարի անմարդկային աղետների տխուր ցուցակը, որոնք իրականացվեցին ցեղապաշտական, գաղափարախոսական և կրոնական մոլորեցնող շարժառիթներով և որոնք մթագնեցին մարդասպանների միտքը, ովքեր նպատակադրվեցին ոչնչացնելու մինչև իսկ ամբողջ ժողովուրդներ»: